И покрај елиминацијата на Европското првенство, Драган Стојковиќ Пикси останува селектор на фудбалската репрезентација на Србија.

Репрезентацијата на Србија не успеа да ја оствари целта и да ја мине групната фаза на Европското првенство во Германија, но тоа нема да предизвика големи промени. Селекторот Драган Стојковиќ Пикси и во наредниот период ќе остане на чело на А селекцијата, водејќи ја во елитната дивизија од Лигата на нации, но и во квалификациите за СП 2026 година во Канада, САД и Мексико.

Еден од најдобрите југословенски фудбалери на сите времиња, и покрај неуспехот на ЕУРО 2024, не сака да се откаже од селекторската функција.

Пикси смета дека во наредниот период би можел да ја води Србија до нови успеси – трет последователен пласман на големо натпреварување или победи против некои од најдобрите европски селекции. Од друга страна, ниту Фудбалскиот сојуз на Србија во овој момент не е подготвен да ја прекине соработката.

Една од причините за тоа е новиот повеќегодишен договор кој го потпишаа ФСС и Драган Стојковиќ, кој треба да биде со важност до летото 2026 година, односно да истече по учеството на Србија на следниот Мундијал – доколку се пласира таму.