Во просториите на „Аудиокултура“, на 2 декември (понеделник), во 19:30 часот, ќе биде промовирана книгата „Прес енд плеј“ (Press & Play) на Ненад Георгиевски. Книгата ја претставува македонската музичка сцена преку серија рецензии и текстови напишани во период од 20 години, а објавени во странски публикации, како „All About Jazz“, и во „Vintage Cafe“.

Тоа е збирка од авторски текстови, кои даваат детален увид во креативните активности на македонските музичари и нивните дела. Книгата за првпат беше објавена во јули 2020 година и ова е второ, дополнето издание.

Самата книга е калеидоскоп од луѓе чии таленти, идеи и дела оставиле свој белег во Македонија и надвор од неа. Интервјуата во книгата ги испитуваат нивните амбиции и достигнувања, почнувајќи од инспирацијата со која создавале, оригиналноста, искуствата, начинот на работење, па сè до избраните решенија како илустрации, дизајн, визуелизации.

Публикацијата се состои од рецензии на албуми, на концерти и на фестивалски настапи на разни изведувачи, меѓу кои: Влатко Стефановски, „Леб и сол“, Кирил Џајковски, „Фолтин“, Џијан Емин, Гоце Стевковски, Националниот џез-оркестар, Џон Апелгрен, Зоран Маџиров, „Анастасија“, „Чалгија саунд систем“, „Проект Жлуст“, Сашо Поповски, „Стринг форсис“, „Љубојна“ и многу други, потоа на фестивали како Скопскиот џез-фестивал, „Оф-фест“, или на концерти на македонски изведувачи во држави како Србија, Хрватска, Грција, САД. Тука се и критичките осврти за видеоизданија, како и за книги од визуелните уметности, како „Џезтетика“ на Татјана Ранташа или „Cloud Arrangers“ на Жига Коритник.

„Прес енд плеј“ ја прикажува македонската музичка сцена како уникатен спој од традиционални и современи елементи, културни влијанија и иновации. Преку рецензиите и текстовите читателот добива увид во богатството и шаренилото на музичката култура во Македонија, како и во специфичните стилови и звуци кои ги прават македонските музичари препознатливи на глобално ниво. Со своите содржини, книгата претставува единствен извор на информации за македонската музичка култура, напишани на англиски јазик и платформа достапна за милиони читатели.

Книгата е дело на новинарот Ненад Георгиевски, кој е добитник на државната награда за публицистика „Мито Хаџивасилев – Јасмин“ за 2023 година и е автор на уште четири книги од областа на публицистиката („Музика и муабети“, „Уште музика и муабети“, „Уште музика, уште муабети“ и „Ретки птици“).

Издавач на книгата е „Номад-Арт Скопје“, а идејното решение на дизајнот е на Билјана Билбилоска. Промотор на книгата е проф. д-р Милан Дамјаноски.

(Текстот е објавен во „Културен печат“ број 258, во печатеното издание на весникот „Слободен печат“ на 30.11.-01.12.2024)