Во дербито на петтото коло од квалификациите за пласман на Светското првенство што идната година ќе се игра во Јапонија, Индонезија и Филипини, селекцијата на Словенија предводена од Лука Дончиќ ја декласира Хрватска со 97:69.

По пет кола во групата Ц, Словенија е втора со скор 3-2, додека Хрватска е последна со само една победа.

Сите дилеми околу победникот беа решени уште во првата четвртина која Словенија ја доби со неверојатни 33:8 и потоа рутински ги одработи останатите три четвртини за на крајот да слави со убедливи 28 поени разлика.

Овој натпревар освен по убедливата победа, ќе се памети и по простувањето на Горан Драгиќ од домашните навивачи бидејќи ова му беше последен натпревар за репрезентацијата на домашен терен. Дончиќ постигна 21 поен, Драгиќ 19, а Мајк Тоби 16 поени за Словенија, додека кај „коцкестите“ најрасположен за игра беше Марио Хезоња со 22 постигнати поени.

Во истата група, Финска со 85:69 ја победи Шведска и остана на првото место на табелата со скор 4-1.

Изненадувачки пораз доживеа и селекцијата на Србија од 66:59 на гостувањето кај Летонија во рамки на групата А. Србите иако водеа на полувреме со 25:31, одиграа катастрофално во третата четвртина постигнувајќи само 7 поени, а примија дури 21. Во последните 10 минути не успеаја да се опорават од шокот и го доживеаја вториот пораз во квалификациите. Летонија пак е лидер на табелата во групата А  со скор 4-1.

Резултати:
Финска – Шведска 85:69
Естонија – Германија 57:88
Летонија – Србија 66:59
Грција – Велика Британија 93:71
Словенија – Хрватска 97:69
Белгија – Словачка 102:59
Полска – Израел 90:85