Светската премиера на филмот „Планината не оди никаде“ (The Mountain Won’t Move) на режисерката Петра Селишкар ќе се одржи на 5 април во рамки на интернационалната натпреварувачка програма на фестивалот „Visions du Réel“ во Нион, Швајцарија, најстариот фестивал за документарни филмови во Европа.

Филмот е реализиран во продукција на „Петра Пан Филм“ (Словенија), „Синефаж продукција“ (Франција), ППФП (Северна Македонија) во копродукција со РТВ Словенија. Продуценти се Петра Селишкар, Виктор Еде и Сара Ферро, додека извршни продуценти се Бранд Ферро и Ивана Нацева.

Во македонските планини, на 2.400 метри надморска височина, тројца браќа со своите овчарски кучиња ја одржуваат вековната традиција, растргнати помеѓу нивниот начин на живот и соништата за поинаква иднина. Секоја година, тројцата браќа – Зекир, Зариф и Зани – поминуваат неколку месеци во македонските планини, чувајќи го семејното стадо. Постарите браќа, Зекир и Зариф, ги водат овците на горните пасишта, додека најмладиот, Зани, останува во долната колиба и се грижи за кравите.

Далеку од која било заедница и цивилизација, браќата живеат слободен, но тежок живот, исполнет со напорна работа, едноставни игри и невина радост. Покрај своите два многу помлади браќа, кои Зекир се обидува да ги научи на занаетот, тука е и нивната помлада сестра која понекогаш го посетува Зани, но единствените другари на момчињата се нивните многубројни кучиња шарпланинци. Едно од нив, Беличка – омиленото куче на Зариф – се наоѓа кај еден одгледувач од градот кој склучил сомнителен договор со момчињата.

Како што созреваат, во нивните глави се појавуваат многу прашања: кои се тие, како индивидуи, но и во односот еден со друг? Дали можат да се одржат во живот како овчари? Што ги очекува во иднина? Како растат тензиите помеѓу Зекир и Зариф, вториот сè повеќе посакува да го промени својот живот.

На сценариото за филмот работеа режисерката Петра Селишкар и Танкред Ривиер, директор на фотографија е Бранд Ферро, монтажери се Лорелин Делом и Сашко Потер Мицевски, додека музиката е на Изток Корен. Дизајнер на звук е Владимир Ракиќ, а фоли артист и едитор на звучни ефекти е Вера Галешев.