Музејот на модерна уметност во Њујорк – МоМА ја објави својата престижна програма „Doc Fortnight 2024“, а еден од само тринаесет селектирани долгометражни филмови е и „Молкот на разумот“ на Кумјана Новакова.

Селекцијата на МоМА е програма од најдобрите филмови реализирани минатата година кои за првпат ќе бидат прикажани во Северна Америка, вклучувајќи и филмови кои ќе имаат свои светски премиери.

На ова издание на фестивалот, кураторите на филм вклучуваат автори и авторки кои низ своите дела се соочуваат со историите на насилство и империјализам, разоткривајќи го нивниот одек во сегашноста преку креативна реанимација на историски и заборавени архиви.

Филмот „Молкот на разумот“ на Кумјана Новакова премиерно ќе биде прикажан во МоМА на 25 февруари, а по проекцијата ќе следува и разговор со режисерката. Втора проекција филмот ќе има на 5 март. Ова е прв филм во македонска копродукција кој ќе биде прикажан во официјалната селекција за не-фикција на МоМА во Њујорк.

Досега „Молкот на разумот“ на Кумјана Новакова го освои „Срцето на Сараево“ за човекови права, наградата за најдобра режија на ИДФА во Амстердам, наградата за најхрабар филм на Авторскиот филмски фестивал во Белград, специјалната награда на жирито на Филмскиот фестивал во Торино, како и специјалната награда „Очилата на Ганди“ под покровителство на „Centro Studi Sereno Regis“ на Филмскиот фестивал во Торино.

Дома филмот беше прикажан на специјална проекција во рамките на фестивалот „Прво па женско“. Во следниот период следуваат премиери на филмот и на најзначајни фестивали во Грција, Шпанија, Чешка, Франција, Романија, како и фестивалски проекции надвор од Европа.

„Молкот на разумот“ е поддржан со уметнички грант од страна на БИРН, а е во македонско-босанска копродукција. Гостувањето на Кумјана Новакова во Њујорк е поддржано од МоМА во Њујорк и Министерството за култура на Северна Македонија.