Челниците на Серија А, на екипите и Италијанската фудбалска федерација бараат начин како и кога да се доигра сезоната за да не останат без парите од ТВ правата, но сега им дојде нов удар и тоа од италијанските доктори.

Еден од водечките инфектолози во Италија, Џовани Реза е противник на идејата Серија А да продолжи во мај.

– Прочитав дека некои од предлозите за да се доигра сезоната се фудбалерите да се тестираат на секои два-три дена, но тоа ми изгледа нереално. Фудбалот е спорт полн со контакти и постои голем ризик за пренесување на коронавирусот и мојот совет е да не се брза со одлуката и во мај да продолжи првенството. Но, за тоа последниот збор ќе го имаат политичарите – изјави Реза.

Во Италија повеќе од 150.000 лица се заразени од коронавирус, а речиси 20.000 лица се починати. Помеѓу заразените имаше 10-тина фудбалери во прволигашите.