Медицинските сестри се потпишувале дека ги боли глава од КАТО системот на Клиниката за онкологија. Тој бил скап, бидејќи една ќеса за ѓубре чинела 100 евра дневно. Реверсите на Клиниката за онкологија кои биле земани од веледрогерија без Клиниката да има склучено договор за јавна набавка правно се погрешни, но се во согласност со Хипократовата заклетва бидејќи се работи за животот на пациентите.

Вака денеска пред Анкетната комисија за скандалот Онкологија сведочеше поранешниот директор на Клиниката, доктор Нино Васев. Васев рече дека не чувствува морална одговорност за ништо од тоа што се случувало на Клиниката.

-Реверсот е земан за да не се прекине биолошката терапија која пациентите веќе почнале да ја земаат. Тендерската постапка беше веќе почната, но доцнеше и не смеевме да го загрозиме животот на тие пациенти кои веќе беа на биолошка терапија. Животот е поскап. Не сме зеле столици или градежен материјал, туку лекови. Сме се обезбедиле како Клиника, дека ако тие фирми изгубат на тендерот тогаш лекарствата ќе бидат донација, рече доктор Васев.

На прашањето на пратеничката Рашела Мизрахи од кого добил дозвола да креира хаос на Клиниката тој одговори дека немал таква намера.

-Не ми било намера да креирам хаос. Мислев дека ќе ја подобрам здравствената заштита на нашите пациенти. Со онколошки пациенти сум 35 години и ниеден човек од моја врата не сум вратил. Клиниката ја затекнав со 6 биолошки лека, еден што завршуваше за четири месеци а друг донација. Имаме 11 одделенија со шефови доктори на науки кои препишуваат терапија за пациенти. Со новата биолошка терапија го подобривме квалитетот и ги зголемивме количините на лековите, посочи доктор Васев.

За него не е јасно како државниот ревизор констатирал дека се загрозувало здравјето на пациентите, кога на сите со индикации им се одобрувала терапија. Не се согласи дека немало протоколи за клиниката за Онкологија. Рече дека последните протоколи се објавени 2010 година во службен весник и секое од одделенијата само прави протоколи и постојано се едуцира за медицината базирана на докази и таа е постојано почитувана.

-Таман работа да сум се мешал на туѓ оддел. Доктори пишуваа истории со лекови, а кај мене одеше на потпис не дали да зема пациентот лек или да не зема, туку дали ги има или ги нема лековите. Водев евиденција да не ги пречекориме количините, објасни доктор Васев.

За стручниот колегиум кој на Клиниката за онкологија го нема 10 години смета дека е негов личен неуспех што не успеал да го состави, но за да ги образложи причините, побара затворена седница. Спомена одредени притисоци, но не конкретизираше.

– Очекуваме еден ден овие лекови кои ни направија главоболка да бидат на позитивна листа, се надева тој.

На прашањето на пратеникот Љупчо Пренџов како се одвивала постапката за земањето на лекови на реверс на Клиниката за онкологија за вртоглави суми, Васев вели дека ако немало лекови, тогаш пациентите чекале неколку дена да бидат повикани.

-Правно, апсолутно се согласувам дека не треба да се зема реверс, но самата суштина е во животната индикација, да не се прекине биолошка терапија која пациентите почнале да ја земаат. Не е оштетен буџетот со реверсот, затоа што тие количини се одземени од идниот буџет, рече екс-директорот на Онкологија.

На прашањето на пратенико Мартин Костовски дали во негово време доктор Васев чул информации за лекување со физиолошки раствор наместо со лек, тој рече:

-Тој што го напиша тоа, треба да го докаже и да поднесе одговорност ако не е така. Имало два случаи во полиција што сум ги пријавил, кражба во дневна болница од 2019 година. Ја пријавија три сестри со главната сестра. Викнавме полиција, сестрата е фатена на излегување со три ќеси лекови. Случајот не влезе во процедура, па со адвокат е вратена на работа и ставена на друго одделение да работи без да биде во можност да дојде во контакт со лекови. Истата личност годинава го повтори делото со новото раководство и е отстранета од работа, раскажа Васев за сестрата А.О. која е обвинета за проневера во службата.

Додаде дека на Клиниката осум години пациенти од Албанија и Косово доаѓаат за брахитерапија односно на зрачење, што додава пари на салдото на самата болница односно, според него е добра работа.

Пратеникот Антонио Милошоски го праша Васев дали веледрогеријата „Пановски“ често добивала тендери.

– Се согласувам со пратеникот Милошевски, апсолутно се согласувам, уште еднаш се согласувам дека не смее само една фирма да е дистрибутер на во мое време 42 проценти, а сега, на 72 посто од лековите на Онкологија. Не смее, се согласувам со вас, благодарам на прашањето, рече Васев.

Најголемиот хаос според него настанал кога се давала терапија која немало пари како да се плати, а не смеела да се прекине. Така, магичниот круг создавал долгови.

За КАТО системот, Васев кажа дека 15 медицински сестри му напишале писмо дека од КАТО ги боли глава, зашто немало изолатор.

-Некомплетно е пуштен, не е пуштен со изолатор. Треба да се менуваат сестрите на секои два часа, а нема персонал. Не може да се вклучи на нашиот интрахоспитален систем. Моментално не е сервисиран, па ни дадоа ценовник за дневни потрошни материјали од 1.500-2.000 фунти. И прашање е дали со гравиметриска вага смее да работат сестри или само фармацевтски техничар. Ова е хронологијата на исклучување на КАТО системот, појасни доктор Васев.

Тој рече дека системот бил купен во 2014 година и не бил лоша идеја, арно ама софтверот не е оспособен и тоа е грешка на производителот.

-Ќеса за ѓубре е 100 евра. Теоретски може да проработи ако се сврзе софтверот и ако најдеме 8 сестри што сакаат да работат на него. Има 150-200 хемотерапии дневно што се мешаат во болницата, рече Васев.

-Совеста не е правен акт, ама јас постапував по неа. А кога правите така, може да настрадате. Си ја загрозувам мојата лична безбедност со реверсот, ама не сум загрозил живот на друг, дециден беше Васев.

Кога дојде време да објасни како мајка му на економскиот директор влегла да се лекува на Онкологија без потврдена дијагноза карцином, Васев кажа дека било време на корона вирус, жената имала низок хемоглобин и ја воделе како сомнителна за карцином. Сепак, според документот што го поседува „Слободен печат“ таа е заведена во системот со дијагноза рак на бели дробови иако имала само анемија. Пратеникот Коцев се вознемири на овој одговор, зашто како што рече двајцата негови родители починале на Онкологија, чекале со месеци, а креветите требало да бидат слободни за пациенти со карцином.

Васев не беше сигурен дали испраќал шестмесечни извештаи до министерот за здравство Венко Филипче.

Поранешниот економски директор на клиниката Нехат Нухи пред пратениците рече дека е наклеветен од „Фокус“ и претставен како најголем криминалец кој продавал лекови во Косово, што според него, е ноторна лага.

-Новинарските текстови во Фокус за наводно корумпирано работење ја потресоа јавноста особено мене а во еден текст лично бев прозван за што пратив демант. По ваквите новинарски текстови кои беше преземена и некаква  полициска акција со која се истражуваше дали имало злоупотреба на биолошка терапија. Бев прикажан како најголем криминалец, одеа дотаму што ме клеветеа дека сум продавал биолошка терапија во Косово, клевета со намера да ми се наштети на честа и угледот. На никаков начин не сум препродавал лекови, ниту со незаконско работење сум билдал долгови на клиниката, рече Нухи.

Тој рече дека долговите на клиниката се креирани од набавка на биолошката терапија со која имало најголеми проблеми. Постапката за набавка, според Нухи, ја спровело Министерството за здравство а самата процедура за јавните набавки, системски била лошо поставена, со несоодветна процедура.

Нухи рече оти бил уверен од лекарите на Клиниката за онкологија, дека ако пациентите приклучени на биолошка терапија престанат да ја примаат, може да починат. 

-Рекоа дека не се Богови и не може да решат на помал број да ја дадат, рече Нухи додавајќи дека на реверсите нема негов потпис.

Во полиција пријавувал изолирани инциденти на кражби и земање мито, во кои не биле вклучени други лица.