Бојан Јовановски го знам две години, кога ми беше пациент. Тој беше опериран двапати. Првата беше пред две години кога му беше намалена телесната килажа, а втората беше од естетска хирургија. Боки имаше 135 килограми, а имаше желба да има 70 килограми, изјави денеска во судница хирургот од болницата „Систина“, лекарот Тони Јосифовски, сведок во процесот „Рекет“.

– Ја познавам госпоѓата Катица Јанева, а го познавам и Зоран Милески викан Кичеец – изјави сведокот Јосифовски.

На прашање на Сашо Дуковски, адвокат на Бојан Јовановски Боки 13 сведокот рече дека некои постоперативни преврски врз Бојан Јовановски се правеле кај Боки 13 дома, бидејќи не сакал да оди во болница, а еднаш и во куќата на Орце Камчев.

– Вие ме информиравте дека и Катица Јанева сака да се оперира – рече хирургот Јосифовски на прашање поставено од обвинетиот Боки 13.

Во овој случај првообвинет Бојан Јовановски, а екс шефицата на СЈО, Катица Јанева е второобвинета.

Одбраната на обвинетиот Јовановски вчера ги повлече од листата на сведоци бизнисменот и поранешен градоначалник на општина Центар, Владимир Тодоровиќ, синот на осомничениот бизнисмен во „Империја“, Цветан Панделески, Дејан, и сопругот на пратеничката Фросина Ременски, Јовче.

Вчера сведочеа стилистот Сергеј Варошлија, сопственичката на продавница за оптика, Марија Јанковска, и сопственикот на галерија Алекс Кртов.

Јовановски е обвинет за перење пари и за примање награда за противзаконито влијание, а Јанева за злоупотреба на службената положба и овластувања.