Доењето на работно место е глобален проблем, треба да се овозможи и на сите други јавни места без предрасуди
Мајчиното млеко е храна и таа треба да биде достапна за бебињата во секое време, а доењето на работно место претставува глобален проблем. По тој повод, Светската недела на доење оваа година се одбележува под мотото „Доење на работа“. Како што денеска истакнаа од Комитето за доење, постои пад на доењето токму поради овие причини. Во Америка само во девет држави е имплементирано доењето да мора да биде платено кога мајката ќе излезе од работното место или кога ќе се донесе бебето на работно место да може да биде доено, бидејќи тоа е лек, тоа е храна неспоредлива со ниедна друга адаптирана формула
Препорачано
Д-р Мими Кимовска-Христова истакна дека свеста кај сите работодавци е од клучно значење, бидејќи така ќе се овозможи непрекинато доење на детето, без разлика дали тоа ќе биде преку доење во домашни услови или носење на работно место
Без разлика на кој начин, она што е важно е правото на доење да биде овозможено без никакви пречки, додава таа.
Д-р Кимовска-Христова апелира доењето да биде овозможено и на сите други јавни места без присуство на предрасуди од околината. Воедно информира дека во последниот период е забележан пораст на бројот на предвремено родени деца, а на нив, како што рече таа доењето им е и повеќе од потребно.
Во однос на адаптираните простории рече дека иако се малку, сепак се присутни, но само во приватните институции, а тоа според докторката треба веднаш да се промени.
Претставниците на Комитетот, исто така истакнаа дека покрај адаптирани простории во секоја институција ќе иницираат и зголемување на законски предвидениот рок за доење на работно место.
Јас знам дека Комитетот за безбедно мајчинство и Министерството ќе застанат позади ова, но јас не знам дали треба да имаме работна средба, како тоа да го изведеме ќе видиме во иднина, ќе се договориме заедно со министерот да биде тоа и секако со претставници од Влада. Значи тоа е еден проблем во нашата држава кој треба сеопфатно да биде решен, изјави докторката.
Во рамки на одбележувањето на неделата на доење Институтот изработи Водич за доење којшто е достапен онлајн на официјалната страна на Институтот.
