На Детската клиника е хоспитализирано осуммесечно доенче со пертусис во стабилна состојба. Тоа е невакцинирано, но е задржано за следење на состојбата, потврди за Телма професор Светлана Кочева.

Се очекува во вторник Комисијата за заразни болести во зависност од актуелната состојба да предложи нови мерки. Во телефонски разговор за Телма, првиот човек на Комисијата, професор Петличковски уште минатата недела кажа дека доколку се има предвид искуството со епидемијата со морбили, Комисијата ќе даде препорака до Државниот здравствен и санитарен инспекторат да ги задолжи градинките тие да направат список на вакцинирани и невакцинирани и да забранат прием на невакцинирани деца и покрај тоа што ваквата мерка можеше да профункционира многу порано.

Вакциналните пунктови работат и во сабота. Вакцинацијата е со засилен интензитет откако на подрачјето на Скопје беше прогласена епидемија од голема кашлица или пертусис.

Според последниот неделен извештај на ИЈЗ регистрирани се 56 нови случаи на голема кашлица, дури 54 од нив се во Скопје.