Претседателот на босанскиот ентитет Република Српска, Милорад Додик, потврди дека нема да се појави на пресудата во среда по обвинението со кое се товари за непочитување на одлуките на високиот претставник на меѓународната заедница, јавија локалните медиуми.

И претходно се шпекулираше дека Додик нема да присуствува на пресудата, но неговиот адвокат ја остави таа опција отворена. Сепак, сега пристигна официјална потврда.

„Донесов одлука. Нема да одам и не морам. Никој тоа не го бара од мене“, рече Додик.

Тој, исто така, ги повика своите поддржувачи, кои редовно доаѓаа пред Судот на БиХ за време на судењето, да не одат во Сараево во среда. Наместо тоа, тој ги покани во Бања Лука на дводневен митинг што го организира по повод овој судски случај.