Претседателот на Република Српска Милорад Додик денеска изјави дека, „како и секој несакан посетител“, и германската министерка Ана Лирман „кришум дошла во Бања Лука за да се сретне со своите пулени“, пренесе „Танјуг“.

„На што спадна некогаш моќната Германија. Очекувам полицијата да ја испрати засекогаш од Република Српска“, напиша Додик на платформата „Икс“.

Германската министерка за Европа и климатски прашања Ана Лирман требаше да одржи средба во Бања Лука со претставници на Партијата за демократски напредок (ПДП), која беше откажана во последен момент. Како што изјави за „Klix.ba“ потпретседателот на ПДП, Игор Црнадак, средбата не се одржала бидејќи Владата на РС ја прогласила министерката за персона нон грата и таа ја напуштила земјата.

Властите соопштија дека полицијата ја спровела Лирман до границата и надвор од територијата на босанско-херцеговскиот ентитет.

Владата во исто време изрази протест „против едностраните и политички мотивирани мерки кои без транспарентна правна основа и со непочитување на принципот на непристрасност, беа преземени од одредени германски функционери, меѓу кои и Лерман, во форма на воведување санкции за претседателот на Република Српска, премиерот и претседателот на Народното собрание“.