Уставен основ за одлуката за овозможување додатоци на плата за уставните судии постои, тврди професорот по уставно право Јетон Шасивари од УЈИЕ, кој сепак додава дека оваа опција во голема мера зависи и од волјата на извршната власт, која ги обезбедува финансиските средства за функционирањето на овој суд.

– Што се однесува до правниот аспект, сметам дека, дополнувањето на Деловникот на Уставниот Суд со додавање на членот 10-а има уставен основ во членот 113 од Уставот каде е пропишано дека, начинот на работа и постапката пред Уставниот суд се уреду­ваат со акт на Судот; а што се однесува до законскиот основ, тој и не може да постои бидејќи во нашиот правен систем нема закон за Уставниот суд како специјален закон, вели професорот Шасивари одговарајќи на прашањата на Слободен печат.

ДКСК се сомнева во уставноста на одлуката за додатоци на плата на уставните судии

Според него ако право за додаток на плата до 35 проценти постои за редовните судии, за Судскиот Совет и за јавните обвинители, нема причина зошто истото право да не постои и за судиите на Уставниот Суд, имајќи го предвид неговиот уставен статус како орган на државата кој ја штити уставноста и законитоста како и зголемениот обем на работа во последниве 7-8 месеци.

– Но, сосема друго е прашањето дали ова право на уставните судии ќе остане само на хартија, ако за тоа не се предвидени средства во буџетот и ако ќе нема согласност од Министерот за финансии, дополнува Шасивари.

Професорот по уставно право вели дека ако уставните судии кои многу често одлучуваат за прашања кои се на пресек помеѓу правото и политиката не се изложени на ризици, тогаш се поставува прашањето, кој друг би можел да биде изложен на ризици кога изрекува право и правда во името на Уставот и законите.

– За прашањето за евентуалниот конфликт на интереси во оваа ситуација, сметам дека мериторна оценка и анализа треба да даде Државната комисија за антикорупција, заклучува Шасивари.