Добитникот на наградата „13 Ноември“ на Град Скопје за публицистика во 2021 година Слободан Петровиќ, од својата апликација за наградата успеа да направи книга-самиздат со наслов „Од кандидат до лауреат“.

Книгата, или применетата новинско-журналистичка инсталација, како што ја ословува самиот автор, е отпечатена во 50 примероци, а авторот планира бесплатно да им ја подели на своите блиски пријатели, на иницијаторот и на поддржувачите на патот до престижната награда.

Во содржината на книгата се поместени предлогот и експликацијата на иницијаторот на кандидатурата за наградата, д-р Сашо Орданоски, како и поддршката за кандидатурата што Слободан Петровиќ ја добил од 20-ина свои колеги, еминентни новинари, писатели, филозофи, режисери, инженери.

Во текстот со наслов „Личност со непресушна креативна енергија“, иницијаторот Орданоски потенцира дека Слободан Цобе Петровиќ, „без никаква дилема е еден од најголемите живи двигатели, творци и уредници во поствоеното македонско печатено новинарство“.

На инвентивен начин во самиздатот, на околу 120 страници, Петровиќ успева со текстови и фотографии да ја раскаже својата професионална и животна биографија, да објави новинарски цртички, да посвети раскази, да истакне новинарски објави за неговите дела, но и несебично да ја претстави листата на сите добитници на наградата „13 Ноември“ во 2021 година.

Самиздатот „Од кандидат до лауреат“ е направен за личен ќеф, но претставува фактографска печатена белешка за еден богат, плоден и возбудлив новинарски живот.

(Текстот е објавен во „Културен печат“ број 109, во печатеното издание на весникот „Слободен печат“ на 11-12 декември 2021)