Струшките вечери на поезијата го објавија добитникот на поетската награда „Млада Струга“ за 2024 година. Свечениот настан се одржа на 8 јули во просториите на „Јуроп хаус Струга“.

За наградата одлучуваше комисија во состав: Славе Ѓорѓо Димоски, претседател, и ВиолетаТанчева-Златева и Андреј Ал-Асади, членови.

– Станува збор за извонредно надарена поетеса, полна со луцидни рефлексии и сензации за животот, времето и светот обликувани спрема потребата во потрага за смисла, но притоа самата е свесна дека и поетскиот говор сам по себе е потрага (по смисла). Ритамот на нејзиниот поетски говор одговара на ритамот на животот: отворено и искрено, без затскривање зад метафори и алузии, таа е сеизмограф на своето време. Филипа Сара Попова не е само обичен забележувач на случувањата, туку има активен однос кон времето што го живееме. Време омеѓено, полно со граници и пречки за слободно растење и извишување. Но во тој „свет што се раѓа и распаѓа“ секој човек е еден мал свет, еден терариум во кој буи животот наспроти границата на стаклениот свод – истакна претседателот на комисијата, истакнатиот поет Славе Ѓорѓо Димоски, во образложението на Одлуката за доделување на наградата.

Филипа Сара Попова е добитничка на наградата за нејзината необјавена поетска стихозбирка „Скршен терариум“. Стихозбирката изобилува со асонанци, метонимии и речиси незабележлив, но исклучително важен ритам во пренесување на мотивот кој се проткајува низ целата книга и ја прави една компактна логичка целина. Филипа Сара Попова користи лесен и разигран јазик, иако полн со симболи, слики и логички корелации помеѓу нив. Од поетичка страна, Филипа Сара Попова го подражава драматичниот импулс на поетскиото битие и духот на современоста.

Филипа Сара Попова е родена во јануари 1998 година. Апсолвентка е на катедрата за Општа и компаративна книжевност на Филолошкиот факултет „Блаже Конески“ при УКИМ во Скопје. Во 2022 година учествува на поетското читање „Отскочна даска“. Поезијата ѝ е објавена во антологиските збирки „Рукописи 45“ и „Ново раѓање на зборот“, како и на феминистичкиот портал „Медуза“ и електронското списание „Репер“.

Нејзини нефикциски текстови се објавени во студентските списанија „Ин медиас рес“ и „Мираж“, како и на „Окно.мк“. Таа исто пишувала филмски рецензии кои се објавувани во електронското списание „Гледај.мк“ и една во печатеното списание „Портрет“.

– Од оваа година, младите поети добиваат уште една можност: возобновената поетска награда „Млада Струга“, којашто во минатото беше желно исчекувана од поетите од помладата генерација. Наградата се доделува за необјавена поетска стихозбирка од млад автор-дебитант. Особено ми е драго што оваа иницијатива беше препознаена и поддржана од Делегацијата на Европската Унија, којашто преку „Јуроп хаус Струга“, најмладата членка на мрежата на „Јуроп хаус“ се покровители, како на наградата „Млада Струга“, така и на наградата „Енхалон“. Ова е уште една потврда за тоа дека се поддржува креативноста на младите поети кои го збогатуваат европскиот културен мозаик, но се поддржуваат и Струшките вечери на поезијата како светски признат и познат фестивал – истакна Тодорче Тасевски, директор на Струшките вечери на поезијата.

Конкурсот за поетската награда „Млада Струга“ за 2024 година беше распишан на 9 мај и беше отворен заклучно со 14 јуни. Наградата „Mлада Струга“ се доделува за најдобра необјавена поетска збирка од млад автор-дебитант, на возраст од 18 до 30 години. Oсвен паричен износ, наградата вклучува и објавување на поетската збирка како дел од изданијата на СВП и учество на фестивалот во чија програма е предвиден портрет на добитникот на наградата.