ДКСК ја запре постапката за заменик директорката на АР – имало вкупно 8 пријави и една во Обвинителство
Антикорупциската комисија ја запре постапката што ја отвори против заменик директорката на Агенцијата за разузнавање, Ивана Стојановска откако во јули минатата година беше поднесена пријава за нејзиното именување дека не ги исполнува условите за нејзиното именување, односно дека работата како асистент кој предава предмети по информатика не може да и се смета за разузнавачки стаж.
Препорачано
-Постапката по предметот оформени по пријави од непознат сторител се запира од причина што по пријава со исти наводи постапува надлежното јавно обвинителство и поради тоа ДКСК нема основ за натамошно постапување. Пријавата и прилозите да се достават до надлежното основно јавно обвинителство – одлучиле членовите на ДКСК на затворената седница за јавноста, поради калсифицираните информации што ги достави АР за директорката Стојановска.
Додека течела постапката им стигнало известување од Обвинителство дека тие оформиле предмет со исти наводи и дека го истражуваат.
Според пријавата, претседателката Гордана Сиљановска Давкова била доведена во заблуда поради тоа што Стојановска наводно доставила лажна биографија и фалсификувани документи. Сепак од Комисијата тврдат дека имаат документи за нејзиното вработување на и Универзитетот и во Агенцијата за разузнавање.
Првата пријава до ДКСК стигнала на 2 јули, но потоа биле поднесени уште седум пријави за нејзиното именување кои биле работени во еден предмет, а од Комисијата било побарано да се утврди и дали имало влијание при нејзиниот избор од политичка партија или лице кое настапувало во име на политичка партија во смисла на Законот за спречување на корупција и судир на интереси.
Но, за ова барање дали при изборот на Стојановска имало партиско влијание, Комисијата се прогласила за ненадлежна.
-Државната комисија цени дека со цитираната законска одредба е воведена општа забрана за политичко влијание или избор, именување, или разрешување на лице на службена раководна или друга функција или должност, со исклучок за случаите во кои со закон е определена надлежност на претседателот на Републиката Собранието и владата или органите на локалната самоуправа да вршат избор именување или да даваат мислење или согласност. Исклучоот се однесува за наброените органи кои по својата природа и состав се политички. ова подразбира дека со оваа одредба не е опфатен предметниот случај о кој се работи за именување од надлежност на претседателот. Во секој случај со споменатата одредба не е конституирано никакво надлежно постапување од ДКСК по поднесени пријави туку законот гарантира судска заштита на лицето кое смета дека е оштетено со актот на именување извршено под политичко влијание – се вели во одлуката на Комисијата.
За директорот на Агенцијата за национална безбедност, Бојан Христовски, ДКСК се прогласи за ненадлежна и истражувањето на валидноста на неговиот сертификат ја остави на Обвинителството кое уште го истражува.
