ДКСК го затвори за јавност предметот за заменичката на АР – претседателката во одбрана на директорките
Државната комисија за спречување на корупцијата го затвори за јавност реферирањето на предметот за заменик – директорката на Агенцијата за разузнавање, Ивана Стојановска во кој се спореше дали таа има најмалку десет години работно искуство од областа на безбедноста, одбраната или надворешната политика како што предвидува Законот за АР.
Препорачано
-Како што најави претседателката, на почетокот на седницата, при реферирањето на наведениот предмет ќе биде исклучена јавноста, согласно член 22 став 4 од Законот за спречување на корупцијата и судирот на интереси, од причина што предметот содржи класифицирани информации – рекоа од ДКСК за овој предмет.
Од Комисијата рекоа дека одлуката за предметот ќе биде објавена без класифицирани информации, но кога ќе се изготви, потпише, заведе.
Членовите на Комисијата минатиот месец конечно се комплетираа со безбедносни сертификати за проверка на документите кои имаат степен на класифицираност, а пријавата за заменик – директорката е поднесена уште во јули минатата година.
Антикорупционерите треба да одлучат дали нејзината научно-истражувачка работа од 2006 до 2016 година на два приватни универзитети ќе ѝ се смета за искуство во областа на безбедноста, со оглед на тоа што Стојановска не предавала предмети од областа ниту на безбедноста, ниту на одбраната или надворешната политика, туку била асистент која предавала компјутерска електроника, вовед во програмирање C, односно предмети од областа на информатиката.
Претседателката Гордана Сиљановска – Давкова пак во одбрана на заменик директорката која ја именуваше, децидна е дека таа во целост го исполнува условот од најмалку 10 години работно искуство и не постои законска пречка при именувањето.
Претседателката стои позади своите одлуки
Од Кабинетот на претседателката тврдењето го образложуваат со тоа што во Законот стои „најмалку десет години работно искуство од областа на безбедноста, одбраната или надворешната политика“ односно тоа што Законот, според кабинетот, не го ограничува кандидатот во поглед на академското искуство, ниту бара само работно искуство во институции поврзани со безбедноста, одбраната или надворешната политика туку се бара искуство од областа на безбедноста, одбраната и надворешната политика.
– Впрочем, Факултетите за безбедност и политички науки обучуваат кадри за институции што работат во безбедносниот сектор – велат од Кабинетот на претседателката за „Слободен печат“.
Како аргумент на своја страна го ставаат тоа што Стојановска била асистент од 2007 до 2014 година по информациски технологии и специфичните предмети на Факултетот за детективи и безбедност што, според нив, е релевантно искуство од областа на безбедноста и надворешната политика, иако таму предавала Применета информатика и Е-општество. Дури го истакнуваат и тоа што таа била на раководна позиција од страна на претходниот директор на Агенцијата, Еролд Муслиу кого Сиљановска го разреши предвреме.
-М-р Ивана Стојановска била поставена на раководна позиција од претходниот директор на Агенцијата за разузнавање, не само заради нејзиниот профил на извонредна студентка, која дипломирала на Електротехничкиот факултет при УКИМ на насоката Компјутерска техника, информатика и автоматика со просечна оценка 8.72 и завршила постдипломски студии со 9.90, туку и заради нејзиниот ангажман во периодот од 2007 до 2014 како асистентка по Информациско комуникациски технологии и специфичните предмети на Факултетот за детективи и безбедност, што е релевантно работно искуство од областа на безбедноста и надворешната политика. Во современиот свет на техничко-технолошкиот развој, комуникациите, комуникациските и информатички технологии се релевантни за сајбер безбедноста и разузнавачки активности итн. Значи, работното искуство како асистент, надвор од Агенцијата, е целосно релевантно за исполнување на законскиот услов – велат од Кабинетот на претседателката.
Предавала информатички предмети
На страницата на Агенцијата за разузнавање објавена е нејзината биографија, според која Стојановска од 2006 до 2016 година била асистент за научно-истражувачка работа, додека од 2016 до 2024 година работела во Агенцијата за разузнавање, прво како раководител на одделение во Директоратот за техничко разузнавање и информатичка поддршка, потоа како раководител на овој сектор и на крај раководела со Секторот за информациски и комуникациски технологии.
„Слободен печат“ имаше увид во дописот кој го пратил Американскиот универзитетот на Европа – ФОН до ДКСК уште во септември минатата година, каде Стојановска работела како асистент. Во дописот може да се види дека Стојановска била избрана прво како помлад асистент на Факултетот за политички науки и меѓународни односи по предметот Информациски технологии. Потоа била именувана во звање помлад асистент на Факултетот за информациски и комуникациски технологии, потоа станала асистент, а била избрана од страна на Факултетот за информатика од областа на информатичките технологии.
Како асистент таа предавала по предметите Компјутерска електроника, Вовед во програмирање, Принципи за логички дизајн и дискретни автомати, Објективно ориентирано програмирање, Компјутерски компоненти, Софтверско инженерство, Објектно ориентирана анализа и Теорија на игри.
Освен што била ангажирана како асистент на Факултетот за информатика, таа била ангажирана и на Факултетот за детективи и безбедност по предметот Применета информатика, на Факултетот за политички науки и меѓународни односи, на Факултетот за правни науки и на Факултетот за економски науки по предметот Е- општество.
Освен за Стојановска, ДКСК имаше добиено претставка и за директорката на Агенцијата за разузнавање, Габриела Јаковлева во која било наведено дека не доставувала извештаи за работата на Агенцијата ни до Собранието, ни до претседателот на Владата.
Но, Комисијата се прогласи за ненадлежна за овој предмет уште минатата година и ѝ го прати на претседателката Сиљановска-Давкова под чија надлежност е Агенцијата за разузнавање.
– Во однос на прашањето за директорката на Агенцијата за разузнавање, Габриела Јаковлева, оформен e предмет по кој веќе e донесена Одлука на седница на ДКСК, во која е констатирано дека ДКСК нема надлежност во однос на пријавените наводи и дека за истото достави известување до Претседателот на Република Северна Македонија, заради натамошно преземање на мерки за надлежно постапување. По однос на истото ДКСК нема добиено информација од страна на Претседателот на РСМ во однос на преземени активности – велат од ДКСК за „Слободен печат“.
Јаковлева е чиста
Од Кабинетот на претседателката пак за „Слободен печат“ велат дека никаде во известувањето претседателката немала никакво задолжување ниту обврска за повратна информација за преземени активности до ДКСК и дека пријавата против директорката била отфрлена. Оттаму додаваат дека анонимниот дојавувач се обидува да креира погрешна слика.
-Заради точност во информирањето, Ви појаснуваме дека Агенцијата е посебен орган на државна управа кој согласно членот 3 став (2) ,,ги известува претседателот на Република Северна Македонија, претседателот на Владата на Република Северна Mакедонија, претседателот на Собранието на Република Северна македонија, Советот за координација на безбедносно –разузнавачката заедница, како и други органи на државната управа во зависност од прашањето што е предмет на известување“. Од незнаење, или со лоша намера (mala fide), анонимниот дојавувач се обидува да креира погрешна слика дека сите материјали Агенцијата ги доставува до сите законски утврдени субјекти, а не во зависност од природата на нивната работа или на барање на конкретниот државен орган. Тврдењето дека претседателот на Собранието не добил ниту една информација е неточно, оти за време на мандатот на претходниот директор тој добил две информации, а во време на сегашната директорка – девет. Ве информираме дека претседателот на Собранието и самиот може да бара информации од Агенцијата што се од интерес за неговата работа. Истовремено појаснуваме дека согласно член 5 став (4) и (5) директорот е самостоен во извршувањето на работите на Агенцијата и за својата работа му одговара на претседателот, велат од Кабинетот на претседателката за „Слободен печат“.
По промената на власта, ВМРО-ДПМНЕ ги смени челните позиции на безбедносните служби пред да им истечат мандатите на претходниците, па на местото на Еролд Муслиу во Агенцијата за разузнавање ја именуваше Јаковлева и заменичката Стојановска, а во Агенцијата за национална безбедност (АНБ) на местото на Заре Милошевски го именуваше Бојан Христовски за кого имаше девет претставки до ДКСК, но Комисијата не најде ништо спорно во неговото именување. Јазичниот сертификат, кој беше еден од оспорените пред ДКСК, сега го проверува скопското јавно обвинителство. Инаку, во АНБ каде претходно заменикот беше избран во мандат на поранешната влада на СДСМ и ДУИ, сѐ уште нема именувано нов заменик директор.
