Се градат дивоградби на „секој чекор“, се отвораат приватни пристапни патишта, се узурпираат извори, се сечe шумата, а дивите животни се` повеќе се истребуваат.

Ова се најголемите и највпечатливите дејанија кои ги затекнале во пракса, вработените на Националниот парк Шар Планина, кој како установа е формирана пред две години, но на терен работи веќе неколку месеци.

-Станува збор за голем Шарпланински масив, кој треба да го имаме под контрола, а засега сме само 8 вработени. Не` чекаат големи предизвици, велат оттаму.

Плански документ за заштита на дивите животни, заштита на шумата и на државниот имот, ќе бидат трите наши главни приоритети, велат од установата.

Планинското подрачје е запоставено со децении, треба макотрпна работа да се зачува и развива паркот, но истовремено и поддршка од другите институции како и соработката со локалното население.

Додаваат дека во план им е да се постават информативни табли каде ќе се објавуваат содржини и насоки, како да се однесуваме во паркот, согласно законските прописи.

„Исто така очекуваме дека до крај на годината ќе бидат изработени плановите за шумските еко системи, врз база на кои ќе можеме и понатака да работиме. Многу ни е важна соработката со локалното население, многу време трошиме на оваа соработка, подготвени се табли за информирање на локалното население, ќе бидат поставени на главните влезови на паркот. Поставени се и табли за предупредување за забрането палење на оган и слично и покрај овие информативни материјали се подготвуваат и постери кои ќе бидат поставени во селата, за да можат полесно луѓето да се информираат. Исто така подготвуваме и мапа на движење, дозволени патишта на движење на моторизирани возила, џиповите, крос моторите ги има низ сите зони на паркот, а тие се забранети во строго заштитените зони. На територија на паркот е забрането да се лови, јавната установа има обврска да постапува во насока на заштита на дивиот свет. Овој плански документ за заштита на дивиот свет се донесува генерално за утврдување на бројната состојба и првичните пресметки покажуваат дека бројната состојба е далеку пониска од тоа што сме очекувале. Што значи дека ќе имаме тешка задача за да создадеме услови, за да имаме повеќе диви животни на Шар Планина. Единствено животно кое е во пораст е дивата свиња, но за сите други диви животни треба да создадеме мир, пред се за да можат тие понатака да се развиваат беспрекорно. Имаме четири ренџери, но во процедура сме да вработиме уште луѓе. Имаме лоши практики на Шара, многу години е запоставено подрачјето и луѓето се навикнати дека не треба да се бара дозвола, се преземаат сечи на шума, се лови на секој страна, иако е забранет ловот и сечата“, вели Анела Панајотова Раководител на одделение за заштита на природата при НП Шар Планина.

Се работи за Шарпланински масив долг 80 , а широк и до 25 километри. Голем дел од ова планинско подрачје е во состав на новиот Национален парк.

Со децении без контрола и во строго заштитени подрачја, има изградено голем број дивограби и на државно земјиште. Моментално ваквите градби се евидентираат се прават записници и потоа правно ќе се процесуираат.

„Првата активност која ја започнавме, а со неа сме веќе при крај, тоа е евидентирање на сите градби, без оглед дали се легални или нелегални. Ние мора да ги евидентираме сите градби, сега тука зборувам за градби надвор од селата, особено тоа што е на државен имот мора тоа да го евидентираме. Следен чекор е соработка со другите институции, пред се со општините, со катастар, со МВР, да утврдиме кои од тие градби се нелегални и да најдеме начин како да се справиме со истите. Мора да напоменам дека тоа што сме го затекнале сме го затекнале, но во иднина ќе стоиме цврсто на заштита на државниот имот и дека нема да дозволиме нови градби кои се без одобрение оти тоа е кривично дело“, вели Милорад Андриески, раководител на одделение за одржливо користење на природни ресурси при НП Шар Планина.

Состојбата на терен е лоша, но засега со оглед на ресурсите со кои располага Установата НП Шар Планина, поднесени се само неколку кривични пријави за илегална сеча на шума и ловокрадство. Активностите се извршени во координација и партнерство со полицијата која функционира на Шарпланинското подрачје.

Директорот Дехари, единствен вработен во Националниот парк Шар Планина по 17 месеци ги доби првите колеги