Дисциплинска комисија поведе постапка пред Советот на јавни обвинители против поранешната шефица на Обвинителството за спречување организиран криминал и корупција Вилма Русковска, како и против нејзините колешки-обвинителки од ОЈО ГОКК – Ивана Трајчева и Елизабета Јосифовска, за професионални грешки при претресот во Управата за финансиска полиција во јули годинава.

Следната фаза е повикување на седница на подносителот на предлогот за поведување постапка за утврдување дисциплинска одговорност Арафат Муареми и трите јавни обвинителки, кои имаат право да предложат свои докази и непосредно да дадат изјави во врска со поднесениот предлог.

„Постапувајќи по предлогот на Јавниот обвинител на Република Северна Македонија, Комисијата одржа расправа на која го разгледа писмениот извештај од известителот по предлогот за поведување дисциплинска постапка и писмените изјаснувања на јавните обвинителки, по што оцени дека постои основано сомнение дека трите јавни обвинителки сториле тешка дисциплинска повреда од член 91 алинеа 6 од Законот за јавното обвинителство“, се вели во денешното соопштение.

-Против ова решение на Комисијата не е дозволена жалба. Како следна фаза на постапката, Комисијата ќе закаже седница на која ќе биде повикан подносителот на предлогот за поведување постапка за утврдување дисциплинска одговорност и трите јавни обвинителки, кои имаат право да предложат свои докази и непосредно да дадат изјави во врска со поднесениот предлог, стои во соопштението од ОЈО.

Инаку на 16 август годинава, во согласност со член 93 од Законот за јавното обвинителство, Јавниот обвинител на Република Северна Македонија поднесе предлог за поведување дисциплинска постапка за утврдување одговорност на тројца јавни обвинители, за кои постои сомнение дека намерно и неоправдано направиле крупна професионална грешка со што сториле тешка дисциплинска повреда од член 91 алинеа 6 од Законот за јавното обвинителство.

Во исто време, врз основа на член 81 од Законот за јавното обвинителство, Јавниот обвинител на Република Северна Македонија донесе Решение за оддалечување од функцијата за еден јавен обвинител додека трае кривичната постапка поведена по поднесена кривична пријава против наведениот обвинител, соопшти тогаш ОЈО.

По претресот во Финансиска полиција во јули, тогашниот директор Арафат Муареми поднесе кривична пријава против обвинителките од ОЈО ГОКК, по што шефицата на обвинителството Русковска беше суспендирана од републичкиот јавен обвинител Љубомир Јовески. Муареми нешто подоцна се повлече од директорската функција во Финансиската полиција, а Русковска, откако ѝ заврши мандатот, повторно се кандидираше за главната функција во ОЈО ГОКК, но загуби во гласањето на обвинителите од целата држава, кои на нејзино место го избраа Ислам Абази.

Кој е Ислам Абази, обвинителот кој ќе ја предводи борбата против корупцијата и организираниот криминал?