Директорот на ЈП „Комунална хигиена“ Сабахадин Рустеми денеска до медиумите прати нотарски заверена изјава, во која под полна материјална и морална одговорност тврди дека во периодот од 2021 година до денеска претпријатието не му исплатило ниту еден денар, директно или преку авторски договор на Ваљон Беџети, син на актуелниот пратеник од ДУИ, Блерим Беџети.

Според Рустеми, станува збор за смислен напад за дефокус од „политикантите од Вреди, кои се фатени во криминал со дивоградби во Чаир“.

Жиро сметките на јавното претпријатие „Комунална хигиена“ редовно се предмет на ревизија и се достапни за сите надлежни истражни органи. Овие сметки служат како доказ дека не се извршени такви плаќања, факт што може да се потврди во секое време од страна на Управата за приходи на Министерството за финансии – изјави Рустеми.

Тој тврди дека лагите изнесувани во јавноста од страна на „комитите“ од Вреди, се обид да го одвлечат вниманието од нивните активности што се спротивни на законот.

Од „Комунална хигиена“ велат дека изјавата на нивниот директор има за цел да му служи на јавниот интерес преку решавање и отфрлање на обвинувањата што беа сензационализирани во текот на изминатите две недели, но и да го зачува интегритетот на претпријатието во услови на сериозен и континуиран напад врз него од политички центри на моќ што во моментов владеат со Македонија.

ВИДЕО | Арсовска поднесе пријавa во ОЈО: Постапете пред да ги уништат доказите

Како што е веќе познато во јавноста, градоначалничката Данела Арсовска, со снимка во живо од терен, но и со документација посочи десеткатница во Чаир, сѐ уште недоизградена, за која тврдеше дека е легализирана со фалсификувани документи, иако е градена на државно земјиште, без проект и без платени комуналии. Притоа таа обвини дека во општина Чаир постојат 150 дивоградби и објасни дека на Ганиу сите тие дивоградби му се вратени со објаснување како да постапи – или да обезбеди комплетна документација или да ги урне.

Во вербалната пресметка помеѓу неа, градоначалникот на Чаир Висар Ганиу и министерот за животна средина Изет Меџити, која траеше со денови, се слушна сешто. Притоа и Ганиу и Меџити го „поздравија“ фактот дека Арсовска се разбудила по три години и дека конечно дошла и во Чаир, а министерот се закани и со кривична пријава против градоначалничката за, како што рече, лажни тврдења во врска со објектот во Чаир пред кој се сликала и го објавила.

Меџити ѝ се закани со кривична на Арсовска, тврди дека таа е инструмент на ДУИ за дестабилизација на општините

Според Меџити, Арсовска била инструмент на ДУИ за дестабилизација на државата и обвини дека во јавното претпријатие бил ангажиран малолетниот син на поранешниот градоначалник на Сарај, а сега пратеник Блерим Беџети.

Добро е што Арсовска почна од Чаир, но добро е да ја видиме и во Сарај, во Шутка каде што се нејзините партнери, добро е да каже за синот на шефот на парламентарната група Блерим Беџети кој има 17 години и Договор за интелектуални услуги во ЈП „Комунална хигиена“ каде директор е човек на Блерим Беџети. Не случајно се давиме во ѓубре на ниво на Град Скопје, добро е Данела да се занимава со нејзините надлежности, а не со друго – нагласи Меџити.

Ганиу: Госпоѓо Арсовска, ве молам не бидете инструмент на моќниците од ДУИ

Деновиве, пак, на новинарско прашање зошто досега не се фокусирала на Чаир и на Висар Ганиу туку дури сега, на крајот на мандатот, градоначалничката одговори дека Ганиу фалсификатот го направил на 20 март годинава, па поради тоа, како што рече, јасно е дека не можела да постапи пред три години.

Висар Ганиу со фалсификат документи во Општина Чаир незаконски „легализирал“ згради од по 50 стана на 20.3.2025 година. За него нема никаква одговорност, додека луѓе со децении не можат да легализираат по 20 квадрати тераси и гаражи низ цела Македонија. Државата и институциите не функционираат – вели Арсовска.

Скопската градоначалничка сите документи со кои располага во врска со своите тврдења ги достави до Основното јавно обвинителство, а јавноста со нетрпение очекува како ќе заврши случајот.