Д-р Анте Ќорушиќ, специјалист-гинеколог и директор на загрепскиот Клиничко-болнички центар „Ребро“, загинал денеска, откако паднал од противпожарна скала преку која по пократок пат се стигнувало до неговата канцеларија, пишуваат локалните медиуми. Загрепската полиција веднаш пристигнала на местото на трагедијата и допрва треба да утврди како точно дошло до падот. Колегите се во шок и со неверување го потврдуваат немилиот настан.

66-годишниот долгогодишен директор на Клиничкиот центар паднал од скалите кои се од надворешната страна на управната зграда на КБЦ, на чие приземје се наоѓа супермаркет. Тие скали водат до неговата канцеларија, а тој наводно се симнувал за да купи цигари.

„Сите тргнуваат по кратенка по тие противпожарни скали што водат до „Конзум“ на приземје, а тие скали се страшни, со дупки во кои лесно може да ти пропадне ногата. Еднаш се качив по тие скали и си реков: веќе никогаш. Се чудам како луѓето од управата постојано ги користат тие скали“, изјави лекар од „Ребро“ за „Вечерњи лист“.

Како што пишува агенцијата Хина, докторот Ќорушиќ, кој на почетокот на следната година требало да оди во пензија, паднал од противпожарните скали, од височина меѓу седум и осум метри. Удрил со главата во плочникот и починал на самото место. Како што се дознава, неговите колеги се обиделе да го реанимираат, но не успеале. Информацијата за смртта на Ќорушиќ ја потврди и министерот Божиновиќ. Ќорушиќ е роден 1958 година во Сплит, а колегите го опишуваат како вонреден стручњак и прекрасна личност.