Директорот на Клиниката за детски болести доктор Реџеп Мемеди, на 16 август го ангажирал како консултант на Клиниката неговиот братучед Алајдин Мемеди, инаку разрешен економски директор на истата клиника. Оваа информација ја потврдуваат од Детската клиника без да прецизираат каков консултант е Алајдин Мемеди, односно од која област. Сепак за новиот консултант се знае дека е поранешен економски директор на Клиниката за детски болести и дека беше  разрешен во ноември 2022 година поради утврдени нерегуларности по извршена контрола на работењето на оваа Клиника спроведена од Фондот за здравствено осигурување. Деновиве имало и раскинување на договорот за дело на млад административен работник, а на негово место дошла замена од стара постава на Клиниката.

Покрај тоа, него Детската клиника го тужи, за да врати 2.300 евра во болничката каса, бидејќи додека бил економски директор платата во дел од периодот му била исплаќана со повисок коефициент од законски утврдениот.

Извори од Детската клиника за „Слободен печат“ велат дека Мемеди добил и своја канцеларија и тоа не било која – туку се вселил во канцеларијата на претходниот економски директор. Се шпекулира дека деновиве била ангажирана и негова секретарка.

Министерството за здравство и Владата се пофалија дека ги укинуваат економските директори поради нивната неефикасност и буџетски импликации, но старите личности со нови модуси се враќаат во болничките ходници и на платниот список.

Инаку, Универзитетската клиника за Детски болести, го тужи сегашниот консултант и поранешен економски директор  Аљајдин Мемеди со барање да врати 147,534 денари во касата на јавната здравствена установа, затоа што овие пари му биле преплатени додека бил економски директор.

Болницата ги бара овие пари на суд, бидејќи Државниот завод за ревизија утврдил дека овие средства од 2.300 евра наводно му биле исплатени на поранешниот економски директор со погрешно пресметан коефициент, а бидејќи не ги вратил веднаш, му се таложеле и камати. Постапката пред Основниот граѓански суд Скопје е оформена и рочиштето по овој предмет е закажано за ноември 2024 година. Државниот завод за ревизија за новиот консултант на Детската клиника во ревизорскиот извештај напиша:

Со извршениот увид во начинот на пресметка и исплата на плати и надоместоци на плата на Клиниката, утврдивме дека во периодот од 1 јануари до 30 септември 2022 година на организацискиот директор му е вршена пресметка на плата по коефициент кој не соодветствува со утврдениот во Поединечниот колективен договор на Универзитетски клиники, поради што во овој период за плата неосновано му се исплатени 133 илјади денари во нето-износ.

Ревизорите наведуваат и дека до денот на вршење на ревизијата не се презентирани докази за наплата на неосновано исплатените средства на организацискиот директор Мемеди.

Ревизијата смета за потребно да истакне дека е неопходно да се преземат активности за целосна наплата на средствата, како и да се зајакнат контролите при пресметката и исплатата на плати и надоместоци на плата на одговорните лица на Клиниката, пишува во ревизорскиот извештај.

Образложението на Владата за укинувањето на економските директори беше рационализирање на трошоците.

Просечната плата за овие лица, согласно колективниот договор, во зависност од работниот стаж изнесувала од околу 64.000 до 75.000 денари нето, односно од 98.000 до 113.000 денари бруто. Покрај тоа, се зголемија и трошоците на установите за користење телефони, службени возила, службени патувања, канцелариски трошоци, административно-технички услуги. Во практиката се случуваше, по завршувањето на мандатот, покрај тоа што овие лица конкурирале на јавен конкурс за вработување на работно место директор, истите да остануваат да работат во установите, без оглед дали има потреба од тој профил на кадар, со што се зголемува и бројот на вработените.

Во минатото имаше 40 јавни здравствени установи со именувани двајца директори и тоа еден здравствен дом, три клинички болници, четири институти, два универзитетски институти, 29 универзитетски клиники и еден универзитетски клинички центар. Во овие установи досега беа именувани двајца директори (медицински и организациски) кои заеднички беа одговорни за работењето на установата како и за обврските што се преземаат во правниот промет.

Како што образложуваа од Владата, постоењето на две раководни позиции, според нив, создало нејаснотии околу распределбата на одговорностите и надлежностите, што во некои установи довело до административни проблеми, усложнување на процесите на донесување на одлуките, отежнато спроведување или неспроведување на одлуките, конфликт на професионалните интереси и несоработка.

Кога медицинскиот и економскиот директор не се согласувале, ова водело управните одбори да мора да одлучуваат и да се пролонгира извршувањето.

„Од друга страна, одредени појави на партизираност и политички влијанија, особено преку позициите на организациските директори, во одредени установи ја наруши објективноста и ефективноста во раководењето. Кај некои установи, постоењето на двајца директори (организациски и медицински), во услови на ваква дисфункционалност во работоводењето, се одрази и во намалување на влијанието на лекарите и другите здравствени работници во донесувањето на одлуките од значење за тековното работење на установата, што последователно влијаеше и на квалитетот на здравствените услуги и здравствената заштита во целина. Ваквото законско решение за двајца директори дополнително финансиски ја оптоварува работата на установите“, пишуваше во предлото од Владата за менување на Законот за здравствена заштита.