Вршителката на должноста директор на Клиниката за белодробни болести кај децата „Козле“, д-р Каролина Симоновска, денеска во допис насловен „изјава“ вели дека забранува нејзиното име да се споменува во медиумите, во каков било контекст.

Д-р Каролина Симоновска, која е директор на јавна, државна здравствена институција, во досега невиденото барање да не ѝ се спомнува името во новинарски текстови кои ја третираат нејзината и работата на клиниката, вели дека ако некој ги спомене нејзините „име и презиме и професионалност“, тоа ќе биде „нарушување на мојот професионален, личен и морален интегритет“. Во исто време, в.д. директорката Каролина Симоновска се заканува и со тужби доколку некој медиум не ја послуша.

„Јас, д-р Каролина Симоновска, именувана за в.д. директор во ЈЗУ Универзитетска клиника за респираторни заболувања кај децата Козле-Скопје, под целосна материјална, професионална и морална одговорност, изјавувам дека не се согласувам и во ниеден случај не давам согласност моето име и презиме и професионалност да биде објавувано по медиуми. Особено во ниеден случај моето име и презиме и професионалност да бидат злоупотребувани на начин што неовластено и во контекст на невистинити објави ќе биде употребувано јавно по медиуми. Секоја постапка спротивна на горенаведеното претставува нарушување на мојот професионален, личен и морален интегритет и го задржувам правото да ги преземам сите законски мерки од секој обид на манипулација или неовластена употреба на моето име и презиме“, се вели д-р Каролина Симоновска во дописот.

На неверојатниот и заканувачки допис од вршителката на директорската должност, д-р Каролина Симоновска, реагираа од Здружението на новинарите на Македонија (ЗНМ), осудувајќи го како јавен притисок насочен кон медиумите.

„Ваквите објави се директна цензура врз новинарите и ја поткопуваат слободата на изразување и независноста на медиумите. Ги потсетуваме сите носители на јавни функции дека, доколку имаат забелешки за објавени медиумски содржини, секогаш може да побараат исправка или демант. Исто така, на располагање им се и телата за саморегулација на медиумите, кои ја оценуваат етичноста и професионалноста на медиумските содржини. Оваа форма на јавни известувања е неприфатлива бидејќи создава атмосфера на заплашување и недоверба, што е спротивно на демократските вредности и јавниот интерес“, велат од ЗНМ.

Д-р Каролина Симоновска беше во центарот на вниманието на јавноста минатата недела, кога искусна и реномирана докторка од болницата ја обвини Симоновска дека незаконски и неправедно ја отпуштила од работа, а Симоновска, во допис со слични стилски и содржински карактеристики, ја обвини колешката дека загрозила постапка за спасување на пациент, со што го заслужила отказот, даден без отказен рок и без отпуштената докторка да биде повикана да даде исказ пред дисциплинската комисија.

ДОКУМЕНТИ | Каролина Симоновска, директорка на детската болница „Козле“ отпушти од работа докторка специјалист за бронхоскопија со 27 години искуство, за време на боледување