„Премиерот тоа го дефинира како лош ден, а јас би го дефинирал како лоши и некоректни изјави, но тоа се лични ставови и видувања, а не официјални на партиите“, вели претседателот на партијата За наша Македонија (ЗНАМ), Максим Димитриевски, во врска со меѓусебните дискредитации што пред неколку дена јавно си ги упатија пратеникот на ВМРО-ДПМНЕ, Антонијо Милошоски, и министерот за правда Игор Филков од редовите на ЗНАМ.

Во гостувањето на Тема на денот на ТВ Сител, Димитриевски вели дека владината коалиција е стабилна и дека во овој момент не постојат никакви отворени прашања кои би ја нарушиле функционалноста на Владата и парламентарното мнозинство.

„Можеби ќе слушаме и во иднина такви изјави, тоа се лични ставови и видувања. Но мислам дека е политички некоректно да се коментира надвор од партиски органи и тела за одредени работи кои, сепак, претходно беа анализирани од страна на самиот мандатар и претставниците во извршната власт. Но, како и да е, ние немаме намера да криеме ништо од јавноста. Нашите членови во партијата, вклучувајќи го и министерот Филков, имаат право на свој издвоен став и мислење и секако и во иднина не исклучувам да има вакви испади или ставови на луѓе во партијата или поддржувачи кои ќе дадат свои лични видувања за поединци од другата страна, вклучувајќи ги и нашите коалициони партнери. Затоа постои демократијата“, вели Димитриевски.

Не е првпат, додава тој, Милошоски да излегува со сопствен став и видување за одредено прашање.

„Во минатото имал такви ставови во однос на мене, упатувал критики, но јас тоа сум го игнорирал не земајќи го здраво за готово. Но како и да е, нормално е дека секогаш пред избори се разгорува реториката којашто ја користат самите политички репрезенти сакајќи да собетар ситни евтини политички поени за себе. Она што е важно е дека Владата и владините партнери се стабилни“, додава претседателот на ЗНАМ.

Димитриевски ја прокоментира и средбата меѓу премиерот Христијан Мицкоски и претседателот на опозициската СДСМ, Венко Филипче, поздравувајќи ги „сите видови дијалог во политичката комуникација“ и истакнувајќи дека „дијалогот во политиката е неопоходен и добредојден“, но рече и дека „не треба да се дава повторно можност креаторот на проблемите да биде и креатор на решенијата“, алудирајќи на Филипче.

Ќе ја растури ли Таравари Вреди пред локалните избори?