Нема да има дотур на буџетски средства за АД ЕСМ и компанијата ќе мора да се снајде за следните обврски, како што е на пример увозот на струја од деловните банки, децидна е министерката за финансии Гордана Димитриеска Кочоска.

-Ниту денар нема да се одлее од Буџетот за ЕСМ, а компанијата може да си земе заем од банките за своите обврски. Ако имаат програма и визија, тогаш банките ќе го сменат мислењето за компанијата. АД ЕСМ е буквално уништена од претходната Влада и сега новото раководство полека се реорганизира за да застане на нозе. Овие напори банките ги препознаваат и мислам дека ќе имаат бонитет за да си земат кредит – објасни министерката на денешната прес-конференција во Владата.

Инаку, ЕСМ е во лоша состојба, а за да се стабилизираат состојбите, извесно е дека компанијата ќе мора да се задолжува со кредити од домашните банки. Колку пари ќе требаат, зависи од тоа колку количини ќе бидат потребни за да се истурка зимата.
Од почетокот на годинава заклучно со 15 октомври ЕСМ потрошила околу 31,7 милиони евра за набавка на струја.

Претходно, премиерот Христијан Мицкоски предупреди дека цената на струјата на отворениот пазар ќе се зголеми во зимските месеци бидејќи Украина чиј енергетски систем е уништен ќе влече струја од Европа, а тоа ќе значи дека на пазарот ќе има и помали количини за државава. Тој, сепак, рече дека државата е подготвена и ќе одговори на предизвиците, но и истовремено додаде дека капацитети за производство се девастирани, во процес на ремонт и со речиси празни хидроинсталации.
Државата ќе мора повторно да се потпре на увоз на струја, заклучи Мицкоски.