Димитревски најави кандидати на ЗНАМ во Куманово и Центар, поддршка за кандидатите на ВМРО-ДПМНЕ во другите градови
Градоначалникот на Куманово и претседател на ЗНАМ, Максим Димитриевски, вечерва изјави дека неговата партија ќе има кандидати за градоначалници во Куманово и во Општина Центар, но и во други места, како и дека официјално имињата ќе бидат соопштени во втората половина на август. За тоа дали ќе биде повторно кандидат за градоначалник на Куманово рече дека неговото име веќе е објавено во партијата, но оти внатрешните постапки се уште не се завршени.
Препорачано
– Се уште разговараме (со ВМРО-ДПМНЕ), но според мене извесно е дека ЗНАМ ќе има кандидати за градоначалник во Куманово и во Општина Центар и дека ќе бидат поддржани од нашиот коалициски партнер ВМРО-ДПМНЕ, а дополнително СДСМ веќе го објави нивниот кандидат и за Куманово и за Центар,изјави вечерва Димитриевски во вестите на ТВ Сител.
Димитриевски потврди дека договорот е поддршка од владиниот партнер ВМРО-ДПМНЕ за нивните кандидати за градоначалници и оти ќе го повика членството на ЗНАМ да ги поддржи кандидатите на ВМРО-ДПМНЕ во Скопје и во другите градови.
За поддршка од ВРЕДИ рече дека ЗНАМ нема договор со нив туку со ВМРО-ДПМНЕ, но, додаде дека, секако дека постои можност за разговор на таа тема бидејќи просторот за соработка со ДУИ е затворен се додека не видат „ново реформирано ДУИ, со нови имиња, со нови кадри“.
ЗНАМ, рече Димитриевски, на овие избори настапува самостојно со советнички листи, нова политичка партија е и секои избори за партијата се корисни за да се провери меѓу граѓаните.
