На најголемиот христијански празник Велигден пливачкиот клуб „БЕТА Шаркс“ сподели убава вест за нов кадетски и јуниорски рекорд на Македонија и два нови члена во македонската пливачка репрезентација.

Пливачот на „БЕТА Шаркс“, Димитар Тодоровски исплива време од 30,49 секунди во дисциплината 50 метри градно освојувајќи го првото место на пливачкото првенство во Германија кое се одржуваше викендов во Инголштат со што го собори државниот рекорд на Македонија во истата дисциплина во кадетска и јуниорска конкуренција. Во истата дисциплина членот на „БЕТА Шаркс“, Дамјан Тодоровски исплива до второто место со време од 31,64 сек.

Резултатите на Димитар и Дамјан во дисциплината градно се во сериозен подем, а со нивните последни остварувања и пласмани како прв и втор во своја категорија во јужниот дел на Германија и пласирани меѓу топ 10 пливачи во своја возраст на ниво на цела Германија го остваруваат правото да учествуваат на Националното првенство на оваа земја кое ќе се одржи од 22 до 26 мај 2024 година во Берлин.

Воедно како што објавија од ПК „БЕТА Шаркс“, со ваквите резултат Димитар и Дамјан добиваат статус на државни репрезентативци и гордо влегуваат во репрезентацијата на Македонија за учество на силниот репрезентативен натпревар КОМЕН КУП кој ќе се одржи во Лимасол, Кипар од 14 до 16 Јуни, 2024 год.

Исто така, забележителни резултати бележи и уште еден член на ПК „БЕТА Шаркс“, Јована Тодоровска која е помала сестра на Димитар и Дамјан. Тодоровска освои четири медали на натпреварот „Регенсбург Куп 2024“ значително подобрувајќи ги своите најдобри резултати.