Еден од највлијателните стрипови – „Дилан Дог“, наскоро ќе добие ТВ серија, а според најавите може да се претпостави дека „детективот на невозможното“, конечно ќе биде екранизиран во скапа продукција.
Џејмс Вон, режисерот на „Аквамен“ и креатор на хорор франшизата „Сложувалка на стравот“, изјави дека ќе ја продуцира серијата за култниот стрип лик Дилан Дог и за таа цел се здружи со италијанскиот издавач „Серџо Бонели“.

Серијата од десет епизоди ќе биде на англиски јазик и ќе се базира на популарната серија стрипови на Тицијано Склави, во која главни ликови се Дилан Дог, истражувач на паранормалното и неговиот помошник Гручо. Стрипот се издава веќе 33 години и досега се излезени повеќе од 500 епизоди.
Вон ќе ја продуцира серијата преку неговата компанија „Атомик монстер“.

„Дилан Дог е еден од моите најомилени стрипови. Со него се запознав уште во средно преку еден пријател од Европа и иако не го разбирав странскиот текст, лесно ја разбрав приказната преку убавиот цртеж. Возбуден сум што добив можност да го пренесам на филм“, изјави Вон.

Дилан Дог, чиј лик е заснован врз британскиот актер Руперт Еверет, досега имаше само две филмски адаптации, но поради скусениот буџет и лошата дистрибуција овие проекти не беа прикажани во поголениот дел од земјите во светот.

Секако „Дилан Дог“, шармантниот, но во исто време и циничниот детектив, заслужува да добие квалитетна екранизација и конечно да се популаризира во Северна Америка.