Американската компанија „Џонсон&Џонсон“ во третиот квартал од оваа година ќе започне со испорака на 220 милиони дози од вакцината за единечна доза против ковид-19 за 55 земји од Африканската Унија. Компанијата потпиша договор со Африканскиот труст за набавка на вакцини (АВАТ), со можност за набавка на дополнителни колични од 180 милиони дози до 2022 година. 

Договорот беше склучен по повеќемесечни преговори со Африканската Унија, а во јануари беше објавен привремен договор за купување на 270 милиони дози вакцини од три производители на лекови – „Џонсон&Џонсон“, „АстраЗенека“ и „Фајзер“/„БајонТек“. Статусот на разговорите со другите две компании не е познат.

АВАТ денеска соопшти дека голем дел од 55-те членки на Африканската Унија дале предност на вакцината на „Џонсон&Џонсон“.

Снабдувањето со вакцини ќе му помогне на континентот да ја постигне целта за имунизација на најмалку 750 милиони луѓе или 60 отсто од населението, бидејќи се прават обиди за спречување на ширењето на вирусот од кој починаа 121.000 луѓе и се заразија 4,18 милиони лица во регионот.