Третото издание на „Златна рамка“, покрај ревијата на најновите домашни филмски остварувања и наградите за членови на ДФРМ, донесе и повеќе барања на филмските работници.

Друштвото на филмски работници на Македонија (ДФРМ) одлучно бара: годинава филмскиот буџет по пат на ребаланс да биде вратен на стапката пред пандемијата, да се вратат алтернативните извори на финансирање, нешто што е сосема нормално во европските кинематографии (телевизија, кино, лотарија, акцизи на цигари, алкохол, газирани пијалаци) и да се овозможат даночни олеснувања за вложување во аудиовизуелната дејност, налик на оние во спортот. Овие барања беа потенцирани на Годишното собрание на ДФРМ, што се одржа во Кинотеката на РСМ во рамките на третото издание на „Златна рамка“.

Барањата произлегоа од дискусијата за време на отворениот дел на собранието, каде што претседателот на ДФРМ, Игор Иванов – Изи, се осврна на актуелната состојба на македонскиот филм и националната кинематографија, пред сè, на распределбата на буџетот на Министерството за култура.

– Од 170 милиони денари во 2019, во 2020 во три наврати беа скратени цели 85 милиони. Имајќи предвид дека од истите тие средства се покриваат сите административни трошоци на Агенцијата за филм, членарините во Еуроимаж и други организации, плати за вработени и слично, ударот што нашиот сектор го доживеа е огромен. Филмаџиите ниту се вработени ниту имаат пензиско и здравствено осигурување, што не е случај со другите дејности во културата. Ние живееме единствено од производство на филмови – истакна Игор Иванов.

Минатата 2020 година беше комплексна за многу индустрии, вклучувајќи ја и филмската, која се справуваше со многу предизвици поради отежнатите услови за продукција. Уште поголем застој направи тоа што немаше можност за промоција на филмовите, бидејќи речиси сите фестивали беа откажани. „Но, за време на пандемијата ни се случи уште една стварност, а тоа е дека филмот успеа да донесе утеха за време на ограничувањата со кои се соочивме. Ниту една европска земја не скрати средства за аудиовизуелните уметности, напротив секаде се бележи зголемување на буџетот заради крепење на целата индустрија“, беше потенцирано на Собранието.

Македонскиот филм во изминатите четири години доживеа своевидна ренесанса, се забележаа сериозни успеси на светски фестивали, а филмот стана најдобриот културен амбасадор на нашата држава.

– Ова скратување, пренамена на буџетот од страна на Министерството за култура, направена без анализи и без претходни консултации со филмските професионалци и Агенцијата за филм го оценуваме како чин што е спротивен на принципите кои се втемелени во европското филмско семејство, каде што несомнено припаѓаме. Сите сектори се важни и сите ги почитуваме, но македонскиот филм ја доживува својата преродба и секој денар што е намален го доживуваме како навреда што нè демотивира, ова не смее да се повтори, ние тоа не смееме и нема да го дозволиме – додаде Игор Иванов.

(Текстот е објавен во „Културен печат“ број 87, во печатеното издание на „Слободен печат“ на 3-4 јули 2021)