Универзитетската клиника за Детски болести, му поднела тужба на поранешниот економски директор Аљајдин Мемеди со барање да врати 147,534 денари во касата на јавната здравствена установа, затоа што овие пари му биле преплатени, потврдија од Клиниката за „Слободен печат“.

Болницата ги бара овие пари на суд, бидејќи Државниот завод за ревизија утврдил дека овие средства од 2.300 евра наводно му биле исплатени на поранешниот економски директор со погрешно пресметан коефициент, а бидејќи не ги вратил веднаш, му се таложеле и камати.

– Постапката пред Основниот граѓански суд Скопје е оформена и рочиштето по овој предмет е закажано за ноември 2024 година – велат од Клиниката.

Мемеди беше разрешен на 2 ноември 2022 година од страна на тогашниот министер за здравство, Беким Сали.

Организацискиот директор Аљајдин Мемеди се разрешува од функцијата пред истекот на времето за кое е именуван поради утврдени нерегуларности од извршената контрола на работењето на оваа Клиника. Контролата е спроведена од Фондот за здравствено осигурување, информираа тогаш од Министерството за здравство.

Работите станаа појасни кога излезе извештајот на Државниот завод за ревизија, каде што беше наведено дека ексекономскиот директор добивал плата со повисок коефициент отколку тој што му следувал и дека таа состојба траела со месеци.

Со извршениот увид во начинот на пресметка и исплата на плати и надоместоци на плата на Клиниката, утврдивме дека во периодот од 1 јануари до 30 септември 2022 година на организацискиот директор му е вршена пресметка на плата по коефициент кој не соодветствува со утврдениот во Поединечниот колективен договор на Универзитетски клиники, поради што во овој период за плата неосновано му се исплатени 133 илјади денари во нето-износ.

Овие состојби се утврдени при вршење на контрола од страна на Фондот за здравство и потврдени со наод и мислење од вешто лице ангажирано од Клиниката и со решенија констатирани од страна на актуелниот медицински директор, со кои е дадено задолжение да се изврши поврат на средствата, пишува во ревизорскиот извештај.

Ревизорите наведуваат и дека до денот на вршење на ревизијата не се презентирани докази за наплата на неосновано исплатените средства на организацискиот директор Мемеди.

Ревизијата смета за потребно да истакне дека е неопходно да се преземат активности за целосна наплата на средствата, како и да се зајакнат контролите при пресметката и исплатата на плати и надоместоци на плата на одговорните лица на Клиниката, пишува во ревизорскиот извештај.

Минатата недела „Слободен печат“ го праша медицинскиот директор на Клиниката за детски болести, Реџеп Мемеди, дали Аљајдин Мемеди ги вратил парите во касата на болницата, но тој не упати одговор да бараме од правната служба. Инаку, двајцата се во роднинска врска и поранешниот економски директор деновиве е присутен во Клиниката и според некои шпекулации кои не ги потврдивме, не е исклучена можноста работно да биде повторно ангажиран. Медицинскиот директор го негираше тоа.

– Нема никаква функција. Доаѓаат луѓе во мојата канцеларија, ми честитаат, нема никаква функција – одговори тој.

Инаку во Собранието неделава на дневен ред во Комисијата за здравство се наоѓаат измените на Законот за здравствена заштита со кои се цели да се укине функцијата економски директор поради рационализирање на трошоците.

Просечната плата за овие лица, согласно колективниот договор, во зависност од работниот стаж изнесува од околу 64.000 до 75.000 денари нето, односно од 98.000 до 113.000 денари бруто. Покрај тоа, се зголемија и трошоците на установите за користење телефони, службени возила, службени патувања, канцелариски трошоци, административно-технички услуги. Во практиката се случуваше, по завршувањето на мандатот, покрај тоа што овие лица конкурирале на јавен конкурс за вработување на работно место директор, истите да остануваат да работат во установите, без оглед дали има потреба од тој профил на кадар, со што се зголемува и бројот на вработените.

Досега имаше 40 јавни здравствени установи со именувани двајца директори и тоа еден здравствен дом, три клинички болници, четири институти, два универзитетски институти, 29 универзитетски клиники и еден универзитетски клинички центар. Во овие установи досега беа именувани двајца директори (медицински и организациски) кои заеднички беа одговорни за работењето на установата како и за обврските што се преземаат во правниот промет.

Според Владата и министерот за здравство, Арбен Таравари, досегашното искуство покажало низа слабости во јавните здравствени установи во кои беа именувани двајца директори.

Постоењето на две раководни позиции, според нив, создало нејаснотии околу распределбата на одговорностите и надлежностите, што во некои установи довело до административни проблеми, усложнување на процесите на донесување на одлуките, отежнато спроведување или неспроведување на одлуките, конфликт на професионалните интереси и несоработка.

Кога медицинскиот и економскиот директор не се согласувале, ова водело управните одбори да мора да одлучуваат и да се пролонгира извршувањето.

„Од друга страна, одредени појави на партизираност и политички влијанија, особено преку позициите на организациските директори, во одредени установи ја наруши објективноста и ефективноста во раководењето. Кај некои установи, постоењето на двајца директори (организациски и медицински), во услови на ваква дисфункционалност во работоводењето, се одрази и во намалување на влијанието на лекарите и другите здравствени работници во донесувањето на одлуките од значење за тековното работење на установата, што последователно влијаеше и на квалитетот на здравствените услуги и здравствената заштита во целина. Ваквото законско решение за двајца директори дополнително финансиски ја оптоварува работата на установите“, велат од Владата во предлогот за менување на Законот за здравствена заштита.