Детска едукативна инсталација „Во имагинарниот свет на децата“ денеска беше поставена во паркот кај полицијата во Ѓорче Петров. Токму за локацијата на која што денеска беше промовирано детското катче претходно се шпекулираше дека ќе се градат станбени згради.

– Денеска во општина Ѓорче Петров отвораме едно мало ново катче за нашите најмили и најмлади. Идејата е освен да создадеме место каде што децата  ќе поминуваат дел од своето слободно време, кај нив од мали нозе да почнеме да креираме свест и совест за тоа како треба да изгледа една јавна површина, да се грижат самите за неа и да ги чуваат јавните простори во кои инвестираме и како Град и како општина од една страна. Меѓутоа, и одржувајќи го ова чисто да го креваме нивото и на еколошката свест кај сите – порача Шилегов.

Градоначалникот на општина Ѓорче Петров, Александар Наумоски, нагласи дека со новиот ДУП се предвидува апсолутна заштита на зеленилото. Тој повика и на зголемување на еколошката свест, како и на чување на реквизитите.

Претходно, слични детски инсталации беа промовирани во  Карпош, Центар и Чаир и на Водно.

За реализација на оваа просторната едукативната инсталација од Буџетот на Град Скопје потрошени се вкупно 1,8 милиони денари со пресметан ДДВ.