Десетици илјади демонстранти излегоа денес на улиците на Берлин во знак на солидарност со Палестинците во Газа. Демонстрантите повикаа на прекин на израелската војна против Хамас, извикувајќи слогани како „Слободна Палестина“ и барајќи прекин на влошената хуманитарна криза во Газа.

Околу 50.000 луѓе учествуваа во маршот во центарот на Берлин, според полицијата, која распореди околу 1.800 полицајци за да ги следат демонстрациите.

Демонстрантите, исто така, побараа прекин на извозот на германско оружје во Израел и побараа ЕУ да воведе санкции врз Израел, објави германската новинска агенција ДПА, пренесе „Вашингтон пост“.

Минатиот месец, германскиот канцелар Фридрих Мерц изјави дека Германија „до понатамошно известување“ нема да дозволи извоз на воена опрема во Израел што би можела да се користи во Газа. Сепак, Германија не е спремна да ги поддржи санкциите против Израел.

Германија се смета за една од земјите што најмногу го поддржуваат Израел. Таа со децении има цврсто произраелски став, главно поради нејзината историска одговорност за Холокаустот, кој ги обликуваше нејзините повоени политики за обезбедување на израелската безбедност и борба против антисемитизмот.

На посебен протест, околу 100 луѓе се собраа во поддршка на Израел и „против сите форми на антисемитизам“, објави германскиот јавен радиодифузен сервис РББ, додавајќи дека имало изолирани судири кога се судриле двете протестни групи.

Во последните недели имаше и протести за Газа во други европски градови.