Министерот за животна средина Изет Меџити најави дека депонијата „Русино“ кај Гостивар ќе биде модернизирана и опремена со соодветен алат и центар за рециклирање. За таа цел, според него, Владата работи на обезбедување кредит од 55 милиони евра.

Меџити во придружба на градоначаникот на Гостивар Ваљбон Лимани денеска го посети претпријатието „Русино-Полог“ во Гостивар, каде се сретна со директорот Сазан Хорвати, а по средбата, тие заедно ја посетија депонијата која опслужува девет општини од Полошкиот регион, со 184 населени места и 322.000 жители.

Меџити изјави дека целта на посетата е да се направи увид во моменталната состојба на депонијата и да се најават инвестициите кои Министерството за животна средина и просторно планирање ги планира за првата половина од следната година. Тие, според Меџити, имаат за цел оваа депонија да се претвори во современа регионална санитарна депонија за целиот полошки регион.

„Се прават последни обиди за финализација по добиениот заем од 55 милиони евра, од кои голем дел ќе бидат наменети за депонијата „Русино“, со цел опремување на депонијата со нова опрема и отстранување на старите кои сега најмногу ја оптоваруваат оваа депонија. Целата оваа опрема ќе биде сопственост на депонијата и со тоа значително ќе влијае како на управувањето со депонијата, така и на нејзината финансиско организирање. Со овој заем предвидено е и јавните претпријатија од девет општини да бидат опремени со соодветни камиони со цел подигнување на стандардот на овие претпријатија, како и изградба на преносна станица за отпад во Тетово“, изјави Меџити.