Деновиве ќе поевтинат цените на месото, млекото и млечните производи и тоа од 5 до 12 отсто, а до крајот на годината, ќе има и други намалувања, прогнозира министерот за економија Крешник Бектеши.

Според него, веќе се стабилизирани цените на суровините за маслото за јадење, како и на пченицата и на пченката, така што се очекува постепено смирување на инфлацијата, која беше предизвикана од драстичниот скок на хранат и на енергенсите. За да се заокружи листата на компании кои ќе бидат поддржани со поевтина струја, Владата во петок ќе донесе одлука мерката да важи и за одгледувачите на говеда, овци и кози, како и за свињарските фарми.

-Од почетокот на годината се бориме со инфлацијата и сите мерки кои ги донесовме како Влада се во таа насока. Кај лебот веќе почна поевтинувањето. Очекуваме во наредните 3 до 4 дена намалување на цените на млекото и млечните производи, а до крајот на наредната недела и намалување на цените на месните производи, вели министерот за економија. Според него, ако суровините останат на истите увозни цени, од 1 декември се очекуваат и поголеми поевтинувања. Според Бектеши, преку Царинската управа се следат увозните цени на производите.

„Таму веќе почнаа намалувањата, а листата на тие што ќе добијат субвенционирана струја ќе се достави до Државниот пазарен инспекторат и ќе се направат соодветните контроли. Ги повикувам потрошувачите и граѓаните, доколку утврдат дека нема намалување на овие производи согласно процентите, да пријават во Државниот пазарен инспекторат се со цел да намалат и тие цени и залихи кои се направени од одредени компании“, рече Бектеши.

Тој соопшти дека до денес со ЕСМ продажба веќе се склучени околу 1.000 договори за субвенционирана струја, а од нив околу 600 се пекарници од земјава.