Британските опозициски партии и членовите на владејачката партија кои се против идеите на премиерот, денеска ќе му се спротивстават на Борис Џонсон.

Џонсон инсистира на тоа Велика Британија да ја напушти Европската Унија на 31 октомври дури и ако не се постигне договор, со што се наговестува клучниот ден во британската политика.

Парламентот се враќа денеска по летната пауза, а пред најавената суспензија на работата на ова тело, на дневен ред ќе се најде клучниот предлог закон со кој треба  да се спречи излегувањето од ЕУ без договор.

Ако тој закон биде усвоен канцеларијата на британскиот премиер соопшти дека ќе побара повикување на предвремени избори.

Предлогот кој ќе им биде поднесен на пратениците на гласањето денеска е наменет да му се врзат рацете на Борис Џонсон и да му се наложи да бара продолжување на Брегзит процесот до 31 јануари 2020 година, пренесува новинар на „Би-Би-Си“.

Брегзит без договор се смета за опасен затоа што со тоа ќе се прекине повеќдецениската слободна трговија на единствениот пазар од 500 милиони луѓе, но Џонсон инсистира дека можноста за излегување без договор мора да остане на маса како адут во преговорите со ЕУ.

ЕУ пак, цврсто се држи до ставот дека нема повторно да преговара за договорот постигнат после долгите преговори со експремиерката Тереза Меј. Британскиот парламент три пари го отфрлуваше тој договор, а Џонсон го смета за неприфатлив.

Ако помине предлогот на опозициските пратеници, премиерот ќе поднесе предлог за организирање на избори на 14 октомври, предупреди синоќа еден владин функционер.

Тој предлог за нови избори би бил поднесен до пратениците веќе следниот ден и ќе треба да добие дветретинско мнозинство за да помине. Функционер рекол дека избори на 14 октомври би овозможиле нов премиер да се најде на својата функција пред европскиот самит на 17 и 18. октомври во Брисел.
Борис Џонсон денеска попладне ќе им се обрати на пратениците.

Џонсон дури се закани дека оние кои од неговите редовите не се согласуваат со него ќе ги исклучи од партијата ако гласаат за предлогот. Меѓутоа, тоа не ги обесрабри.

Поранешниот министер за финансии, Филип Хамонд, еден од конзервативците кој е жестоко против грубо излегување од ЕУ, денеска за „Би-Би-Си“ оцени дека ќе има доволно поддршка во парламентот за да се блокира излегување без договор.