Поранешниот репрезентативец и спортски директор на македонската фудбалска репрезентација Данчо Масев е осуден на четиригодишна затворска казна откако вчера заедно со уште тројца обвинети, членови на групата на Раде Трајковски – Штекли признаа вина.

Димитар Трајков доби четири години затвор, а Владимир Веселинов и Бранислав Зајков се осудени на по пет години затворска казна. Претходно седуммина од седумнаесетчлената група која се занимава со трговија на кокаин и марихуана најмногу во Аеродром се спогодија со обвинителството и добија казни од 3 до 5 години затвор.

На обвинителна клупа остана Штекли и уште петмина обвинети, а во фокусот на судењето е психичката состојба на Штекли.

Масев заврши во притвор во март и беше разрешен од функцијата директор на А – репрезентација на Македонија. Тој беше разрешен од ФФМ во октомври минатата година, но на почетокот на јануари пак беше именуван, но за кратко време.

Според обвинителството, групата била добро организирана, со јасно дефинирани улоги – од набавка до продажба на кокаин и марихуана. Дрогата се чувала во изнајмени станови, а се продавала по цени од 4.500 до 6.000 денари за грам кокаин и 200 до 300 денари за грам марихуана.

Штекли има шизофренија и халуцинира дека го следи албанска мафија или е свесен и пресметлив?