Во 10:01 часот денеска, 20 март, официјално пристигнува пролетта и иако многумина од нас почетокот на оваа сезона го поврзуваат со 21 март, таа веќе две децении пристигнува еден ден порано.

На првиот пролетен ден во Македонија ќе преовладува претежно сончево време со максимална температура до 18 Целзиусови степени.

Денеска, 20 март е рамноденица, т.е. времето на изедначување на ноќта и денот, што всушност го означува почетокот на пролетта. Во времето на рамноденицата, двете земјини хемисфери подеднакво ги примаат сончевите зраци. Често се вели дека ноќта и денот се еднакви по должина. Всушност, зборот рамноденица доаѓа од латинскиот aequus (еднаков) и nox (ноќ).

Иако многу луѓе на училиште научија дека пролетта започнува на 21 март, во последните две децении пролетта ни доаѓа на календарот на 20 март. Експертите открија дека околу дваесет години пролетта доаѓа еден ден порано, поради два различни методи за одредување на почетокот и крајот на годишните времиња: метеоролошки и астрономски.

Метеоролозите го набљудуваат порастот и падот на температурите и состојбата на атмосферата, а метеоролошката сезона е координирана според календарот, секоја сезона трае три месеци. Со овој метод пролетта трае од 1 март до 31 мај.

Вториот метод се базира на астрономските годишни времиња, кои се однесуваат на положбата на орбитата на Земјата во однос на Сонцето. Астрономскиот календар ги одредува годишните времиња според тоа кога ротационата оска на Земјата е на 23,5 степени во однос на нејзината орбита околу Сонцето, па така во последните години пролетта пристигнува на 20 март.

Пролетта го симболизира повторното раѓање на северната хемисфера на Земјата кога сè во природата се буди. Многу култури имаат пролетни фестивали, а особено се издвојваат Јапонија, Индија и Непал. Доаѓањето на пролетта ја слават со фестивали, каде се симболизира победата на доброто над злото.