Француската државна министерка за Европа, Лоренс Бун, на панел-дискусија во рамки на Бледскиот стратешки форум денеска, го дообјасни францускиот претседател Емануел Макрон откако тој најави дека ќе бара реформирање на ЕУ која би требала да дејствува „со повеќе брзини“, што во Западен Балкан беше протолкувано како нова кочница од Париз за земјите кандидатки и тоа токму кога претседателот на Европскиот совет Шарл Мишел искажа очекување ЕУ да се прошири до 2030 година.

„Сега во ЕУ сме 27 земји, а можеби ќе бидеме и повеќе од 35 најбрзо што може. Знам дека Шарл Мишел рече 2030 година, но дури можеби и порано. Но, потребно е ние самите да се реформираме. И земјите кандидати треба да се реформираат. Можеби не го правевме тоа многу добро во минатото, можеби треба да сме повеќе инволвирани, да помагаме повеќе, да сме подинамични во процесот на проширување за да избегнеме замор и да ги направиме придобивките од идното членство во ЕУ поопипливи за земјите кандидати. Мислам дека тоа се нашите задачи“, изјави Бун.

Министерот за надворешни работи Бујар Османи денеска во Блед остварил билатерална средба со Бун, па на својот фејсбук – профил искажа оптимизам за евроинтеграцискиот пат на Македонија.

„Благодарност за засилениот фокус на Франција во однос на ЕУ перспективата на нашата држава, но и на целиот Западен Балкан. Северна Македонија е посветена на пристапниот процес за членство во европското семејство, а ЕУ треба да најде начин да нѐ вклучи постепено во нејзините политички, економски и административни структури и во структурните и кохезивните фондови уште во текот на преговорите. Само така ќе се справиме со привилегиите и обврските од идното членство“, изјави Османи.

Што значат зборовите на Бун, а што на нејзиниот претседател Макрон, сега ќе се анализира во земјите од Западен Балкан кои бараат членство во ЕУ, но секако ќе се анализира и во земјите членки.