Министерството за образование и наука да ги прекине активностите за менување на наставната програма за шесто одделение и воведување нов предмет Историја и општество од следната учебна година кој треба да замени три одделни предмети, Историја, Географија и Граѓанско образование, повикаа од Демократски сојуз.

Предупредуваме дека со механичко мешање на наставните содржини на три различни предмети се маргинализира изучувањето историја, кој е исклучително важен предмет за сочувување и јакнење на националниот идентитет и за формирање на личноста на младите, се вели во соопшението.

Од партијата велат дека ја осудиле оваа образовна реформа уште кога била „ненаучно и насилно накалемена“ од тимот на поранешната министерката за образование Мила Царовска.

Тогаш предупредивме дека експериментот кој преку спојувањето повеќе различни предмети ќе се испробува во Македонија, врз грбот на нашите најмлади, во таква форма не постои никаде во Европа и во цивилизираниот свет кон кој се стремиме, додаваат од ДС.

Спојувањето на историја со други предмети, според нив испраќа порака дека на Македонците не им е важна историјата и оти може да се сфати како „сечење на корените на македонскиот народ и обид за негово бришење од картата на народите“.

Во меѓувреме бевме сведоци на неспособност на министерството да подготви учебници според новата наставна програма а видовме и печатење нови учебници со скандалозни грешки. Во учебникот за историја и општество за петто одделение, на пример, беа погрешени страните на светот каде што пишуваше дека источен сосед ни е Албанија, а западен Бугарија и дека Монт Еверест е висок 29 илјади метри, наместо осум илјади, потенцираат од Демократски сојуз.

Од партијата посочуваат дека со ваквото темпо на менување на наставна програма и пишување збирни учебници, новите генерации ќе бидат осакатени во знаењето и нема да научат ниту историја, ниту географија ниту ќе стекнат граѓанско образование.

Не сакаме да веруваме дека овие реформи се како резултат на Договорот за добрососедство со Бугарија и одлуките што ги носи заедничката Комисија за историски и образовни прашања. Ја повикуваме Владата да ги разгледа сите аспекти на реакциите од експертите и партиите и да престане да ги третира учениците како експериментални глувци и да го врати предметот Историја во формата како што досега се изучуваше, како посебен предмет, порачаа од Демократски сојуз.