Македонската Дејвис Куп тениска репрезентација го загуби првиот меч во дуелот со Малта од 1 коло од Третата Европска зона од Дејвис купот. Обрад Марковски во мечот на второторангираните тенисери од репрезентациите загуби со 2-1 во сетови 4:6, 6:2, 7:6 (3) од Алекс Дегабриеле за 2 часа и 46 минути игра.

Во првиот сет двајцата играчи до резултатот 3:3 во гемови го освојуваа гемот на свој сервис. Потоа, Марковски направи брејк и поведе со 4:3, но противникот направи „ри-брејк“ за 4:4. Следуваше уште еден одземен гем на сервис на ривалот и Марковски поведе со 5:4, а потоа го реализираше и својот сервис за 6:4 и водство од 1:0 во сетови.

Во вториот сет Дегабриеле почна одлично и поведе со 5:0 со два брејка, а Марковски само еднаш потоа направи брејк за да намали на 5:2, но потоа и во осмиот гем го загуби својот севрвис и Малта изедначи на 1:1 во сетови.

Решавачкиот сет почна со брејк на македонскиот тенисер, но противникот врати веднаш во следниот гем и Марковски ја испушти предноста и до 4:3 немаше ниту еден брејк. Во осмиот гем Марковски направи три двојни сервис грешки и противникот поведе со 5:3. Но, нашиот тенисер го врати брејкот во следниот гем, а потоа изедначи на 5:5. Драмата во сетот продолжи и мечот беше решен во тај брекот кој го доби Дегабриеле со 7:3 откако на крајот имаше серија од четири поени.

Во вториот сингл меч за Македонија ќе настапи Калин Ивановски против Лиам Деликата.