Почна монтирањето на модуларната болница во Дебар, која ќе се протега на површина од 240 квадратни метри и ќе работи како тријажен центар со соодветна лабораторија и други простории.

– Нам, како локална власт, ни беше обврска да го подготвиме теренот и да ја обезбедме потребната инфраструктура. Тоа подразбра дека на просторот каде се поставуваат монтажните објекти претходно е извршен земјен ископ, тампонирање и бетонирање на подлогата. Исто така, се постави водоводна и канализациска мрежа и се спроведоа приклучоци за електрично напојување, изјави Хекуран Дука, градоначалник на Дебар.

Дука, кој по занимање е лекар-специјалист уролог, оценува дека дополнителните објекти значително ќе го зголемат капацитетот на Инфективното одделение во Општата болница со проширена дејност, во чиј круг е модуларната болница и ќе го олеснат справувањето со здравствената криза во поширокиот дебарски регион.

Во меѓувреме, непречено фунционира ковид-центарот во Инфективното одделение, каде набргу ќе почне изградбата на централен систем за кислородна поддршка.

Според официјални податоци на Министерството за здравство, денеска се регистрирани еден новозаразен и 16 оздравени пациенти. Вкупниот број на заразени во Дебар и општина Центар Жупа е 777, починаа четиресеттина лица, а како активни случаи се водат 53. Од нив, двајца се хоспитализирани во болници во Скопје.