Претседателот на Наполи, Аурелио де Лаурентис потврди дека Лучијано Спалети ќе го напушти тимот на крајот од сезоната.

Спалети е тренер на Наполи и македонскиот репрезентативец Елиф Елмас од 2021 година, а оваа сезона го предводеше тимот до првото Скудето по 33 години.

Информациите велат дека најверојатно ќе одмора следната сезона, а потоа ќе се врати на тренерската работа во летото 2024 година.

– Спалети е слободен човек. Кога некој ќе ви каже дека дал сè од себе и дека сака да одмори една година, правилно е да го пуштиме. Имаше уште една година од договорот, но сакаше да си замине. Што можев да направам? Толку многу даде и му благодарам – изјави Де Лаурентис.

„Наполитанците“ се на врвот во Серија А со моментно 87 бода, а сезоната ќе ја завршат в недела на домашен терен против Сампдорија.