Американецот Дастин Вер (32 год, 183 см) сезонава ќе ја доигра во редовите на МЗТ Скопје Аеродром, што за него е враќање во добро позната средина во која настапуваше до пред крајот на јануари оваа година.

Плејмејкерот денеска потпиша нов договор со македонскиот шампион за да го доврши тоа што го почна минатата сезона, кога беше еден од најдобрите во тимот со што го привлече вниманието на побогатите екипи од посилните првенства.

Тој се пресели во француски Шалон Ремс, каде што ја доигра сезоната, а потоа настапуваше за екипи од Венецуела и од Литванија.

– Искусниот Вер доаѓа на местото на Бре Ајви, кој по само неколкуте добри партии во низа доби побогати понуди кои му го нарушија фокусот и посветеноста кон нашиот тим, па изрази желба по секоја цена да си замине. Како и повеќе пати претходно, не сакавме во своите редови да имаме незадоволен кошаркар кој нема да го дава својот максимум, поради што му излеговме во пресрет – информираат од КК МЗТ Скопје Аеродром.

Со вчерашниот пораз на домашен терен против Борац Чачак, составот на Александар Петровиќ направи чекор назад во битката за продолжување на елитниот јадрански статус, но далеку од тоа дека борбата е завршена.

Пред МЗТ се уште многу средби на кои ќе треба да ја покаже решителноста за останување во друштво со најдобрите во регионот. АБА лигата е натпреварување во кое едноставно нема лесни ривали и кое сигурно е меѓу најквалитетните на Стариот континент, што автоматски значи и привилегија и чест само да се биде дел од него.