Данска нема планови да го активира членот 4 од Повелбата на НАТО за безбедносни консултации, изјави во петокот нејзиниот министер за надворешни работи, откако навлегувања на дронови повеќепати оваа недела предизвикаа прекини во воздушниот сообраќај во различни делови на земјата, објави Ројтерс.

Аеродромот во Копенхаген, најпрометниот во нордискиот регион, беше затворен неколку часа во понеделникот навечер, откако беа забележани неколку големи дронови во неговиот воздушен простор. Во наредните денови беа привремено затворени и пет помали аеродроми, и цивилни и воени.

Членот 4 од Договорот за НАТО предвидува дека земјите членки ќе се консултираат секогаш кога, според мислењето на која било од нив, е загрозена територијата, политичката независност или безбедноста на која било членка. Данска првично соопшти дека сè уште не решила дали ќе го активира членот.

Тој ретко бил применуван од основањето на НАТО во 1949 година сè до овој месец, кога Полска и Естонија го активираа – поради навлегувања, соодветно, од дронови и руски борбени авиони.

– Членот 4 е активиран девет пати во целата историја на НАТО и двапати неодамна во врска со Полска и Естонија, па затоа немаме причина да го правиме тоа – изјави за новинарите министерот за надворешни работи, Ларс Локе Расмусен.

Министерот за надворешни работи на Латвија во четвртокот изјави дека Данска им соопштила на своите НАТО-сојузници дека „државни актери“ стојат зад дроновите, но Локе во петокот го отфрли ова тврдење, нарекувајќи го недоразбирање.

– Не сме во ситуација денес каде што можеме да припишеме на некого конкретно тоа што го видовме – рече Локе.

Данската премиерка Мете Фредериксен во вторникот изјави дека активноста на дроновите претставува форма на хибриден напад и ја поврза со Русија. Москва негира дека стои зад овие навлегувања.

Демонстрирајќи ја растечката загриженост кај Данците поради дроновите, вториот најголем аеродром во земјата, Билунд, во петокот наутро беше накратко затворен поради пријава за нелегална активност на дрон, што подоцна полицијата ја идентификува како „сјајна ѕвезда на небото“.

Руски воен брод се криел во близина на Данска за време на инцидентите со дронови над аеродромите