Фудбалската репрезентација на Данска планира „со неколку акции“ на настапот на Мундијалот во Катар да укаже на кршењето на човековите права во земјата организатор, објави Фудбалската федерација на Данска (ДБУ).

Една од предвидените мерки вклучува истакнување на пораки на дресовите за тренинг со кои ќе се критикува Катар поради кршењето на човековите права. Од ДБУ порачаа дека двата спонзори ќе го отстапат своето место на дресовите за да може на тоа место да стојат пораките со критики кон организаторот на СП.

– ДБУ веќе долго време е критички настроен кон Светското првенство во Катар. Многу јасен и силен сигнал е кога и нашите партнери се вклучуваат за подобри услови за работниците. Тие му помагаат на данскиот фудбал, на репрезентацијата и на учеството на европски и светски првенства, а не на поединечни домаќини – изјави претставникот на ДБУ, Јакуб Јенсен.

Данска беше една од првите европски репрезентации кои обезбедија пласман на Мундијалот во Катар и ДБУ тоа ќе го искористи за јасно дa укаже на кршењето на човековите права во Катар, нешто што Амнести Интернешнл го укажа во својот извештај на 48 страници.

Во извештајот се наведува дека илјадници економски мигранти се заробени и искористувани во Катар.
Катарските власти ги отфрлаат ваквите обвинувања, но призна дека „сè уште се работи“ на воспоставување на систем на работа.