Македонската ММА натпреварувачка Даниела Алексовска ја имаше својата прва полупрофесионална борба на боречкиот настан „Армада 13“ каде што беше поразена од Ејба Круз од Република Ирска.

Алексовска добро го започна мечот, особено во првата рунда, кога успеа да ја префрли борбата на земја, терен што повеќе ѝ одговара. Се обиде да направи зафат, но не успеа целосно да го реализира. Круз, во финишот на рундата, возврати со неколку прецизни удари со кои ја презеде иницијативата.

Слично сценарио се повтори и во втората рунда. Алексовска повторно влезе енергично, погоди неколку удари и повторно ја однесе борбата на земја, но Ирката повторно доминираше во завршницата и си обезбеди поенска предност.

Третата рунда беше клучна. Круз агресивно влезе во размена, доби подобра позиција и по неколку прецизни удари, судијата реши да ја прекине борбата, прогласувајќи технички нокаут.

Иако резултатот не беше во нејзина корист, ова беше значаен чекор напред за Алексовска, која досега настапуваше исклучиво на аматерско ниво, каде што се закити со титулата европска шампионка.