Во Сараево дојде како големо засилување пред две години, но повредите го спречија македонскиот фудбалер Даниел Аврамовски да го даде својот максимум во дресот на босанскиот фудбалски клуб.

Му истече договорот со клубот, нема потврда од Босанците за разделба, а Аврамовски преку социјалните мрежи ги информираше фановите дека повеќе нема да биде дел од екипата.

За екипата имаше вкупно 45 настапи во кои забележа четири голови и осум асистенции.

– По две години поминати во ФК Сараево, дојде време за разделба. Горд сум и почестен што бев дел од ваков клуб. Градот Сараево ми е при срце и со задоволство ќе го посетувам. Носам со себе нови драги пријателства и незаборавни спомени. Им благодарам на сите што ме поддржаа, особено на навивачите кои убаво ме прифатија. На клубот му посакувам сè најдобро во иднина, бидејќи тоа го заслужува – стои во објавата на Аврамовски.

Потсетување дека пред седум дена ФК Сараево го промовираше нашиот репрезентативен голман Дејан Илиев.