Ако во некој пораз има и некои добри моменти, тогаш на кошаркарскиот натпревар Македонија-Литванија може да се запише еден, токму таков.

Го има Дамјан Стојановски, еден од нашите репрезентативци со најголемо акумулирано искуство, а е поврзано со едне несекојдневен ефект, барем кога станува збор за едно репрезентативно ниво, што со себе го носат квалификациските натпревари, во овој случај, за пласман на Евробаскетот во 2025 година.

На средбата со Литванија, македонскиот репрезентативен бек имаше поголем број на освоени топки отколку во оние други статистички категории.

Реализираше дури пет, што е најдобар индивидуален ефект во овој трет квалификациски круг.

Секако останува жалење што овој негов придонес во фазата на одбрана, не беше валоризиран со успешен резултат, но е потврда плус за пожртвуваноста која на теренот ја дава Дамјан Стојановски, кој за потсетување, наскоро, поточно на 9 декември, ќе наполни 37 години.