Можеби мислите дека ги знаете причините зошто луѓето уживаат во бакнувањето, но новата студија објавена овој месец ја открива вистинската историја на оваа интимност.

Истражувањето спроведено од Адријано Р. Ламеира, професор по психологија на Универзитетот во Ворвик во Англија, открива дека бакнувањето некогаш било еволутивен инстинкт, форма на однесување кое служело за негување на други суштества.

Ламеира спроведе истражување за кое тврди дека доказите сугерираат дека бакнувањето не е сигнал за љубов во човечка смисла. Тој верува дека тоа некогаш било дел од методот за отстранување на вошки, пишува „Њујорк пост“ .

„Бакнувањето претставува преживеана, дегенерирана форма на грижа за примати која ја задржала својата оригинална форма, контекст и функција“, објаснува тој.

Студијата за однесувањето на мајмуните сугерира дека бакнувањето е всушност последната фаза од контактот со усните за време на негувањето, кога негувателот го повлекува крзното или кожата на друго животно во нивната уста за да ги отстрани остатоците или паразитите.

Ламеира проценува дека луѓето „почнале интимно да се бакнуваат“ пред околу четири милиони години, а најраниот запис за бакнување може да се најде во текстовите на Месопотамија од околу 2500 година пр. н. е.

„Како бакнувањето стана интимен чин останува нејасно“, рече Ламеира, додавајќи дека бакнувањето со „интимна намера“ е „посебен случај“ и дека е потребно дополнително истражување за да се разбере како бакнувањето и сексот се испреплетеле.

„Денес бакнувањето симболизира доверба и припадност“, нагласува професорот.